Qazaqstandyq balýandar halyqaralyq arenada ózderiniń joǵary deńgeıin taǵy da dáleldedi: Bakýde aıaqtalǵan kúres boıynsha jasóspirimder (U17) álem chempıonatynda Qazaqstan quramasy taǵy tórt medal jeńip aldy, dep habarlaıdy infohub.kz saıty.
Qazaqstan komandasynyń qorjynynda — bir altyn jáne úsh qola. 48 kelige deıingi salmaq dárejesinde Bakdaýlet Agabek altyn medal ıelendi, al qola júldegerler Mardan Orynbasar (60 kg), Ádilet Rysbaı (71 kg) jáne Injý Bakkoja (46 kg) atandy.
Erkin kúres jarysynda Bakdaýlet Agabek Tájikstan, Bolgarıa, Mońǵolıa jáne Ózbekstan balýandaryn jeńip, fınalǵa senimdi jol tartty. Sheshýshi beldesýde qazaqstandyq sportshy Úndistan ókili Arándy basym túsip, aıqyn jeńiske jetti.
Qola medal úshin ótken jubanysh beldesýlerinde Mardan Orynbasar grýzıalyq balýan Davıt Mdzevashvılıden basym tússe, Ádilet Rysbaı túrikmenstandyq Mekan Hýdaıberenovten kúshtirek boldy.
Ókinishke qaraı, Danıar Zamır (65 kg) men Saǵyndyq Temirǵalı (110 kg) úshinshi oryn úshin beldesýde jeńilip, tuǵyrdan bir qadam qaldy.
Osylaısha, Qazaqstannyń erkin kúres boıynsha jasóspirimder quramasy álem birinshiligin bir altyn jáne eki qola medalmen aıaqtady.
Áıelder kúresi jarysynda qazaqstandyq komanda da medal qorjynyn tolyqtyrdy. Aısha Ábdimalik (65 kg) jeńip alǵan kúmis medaldan bólek, Injý Bakkoja úshinshi oryn úshin beldesýde reseılik Alına Baranovany jeńip, qola júldeni ıelendi.
Aıanat Meınambaı (49 kg) men Arýjan Baqytnur (61 kg) qola medal úshin beldesýde jeńilip, besinshi orynmen qoshtasty.
Eske sala keteıik, buǵan deıin Qazaqstannyń grek-rım kúresi boıynsha jasóspirimder quramasy bul chempıonatta úsh medal jeńip alǵan bolatyn: Dıar Amanalı (55 kg) altyn, Álı Almas (48 kg) kúmis, Álinur Tóleýǵalı (71 kg) qola.
Kúres boıynsha jasóspirimder (U17) álem chempıonaty Bakýde (Ázirbaıjan) 27 shilde men 2 tamyz aralyǵynda ótti. Jarysqa 675 sportshy qatysyp, 30 júlde jıyntyǵyn sarapqa saldy — grek-rım, erkin jáne áıelder kúresinen onnan.