Qazaqstanǵa alǵash ret kelgen sheteldikter bank kartalary men shottaryn úshinshi tulǵalarǵa bergeni úshin qylmystyq jaýapkershilikke tartylýy múmkin, dep habarlaıdy infohub.kz saıty.
Respýblıka zańnamasyna sáıkes, bank kartalaryn, shottardy, tólem quraldaryn jáne sáıkestendirý quraldaryn basqa adamdarǵa berýge tyıym salynady jáne Qazaqstan Qylmystyq kodeksiniń 232-1-baby boıynsha jazaǵa tartylýy múmkin.
Mańǵystaý oblysy boıynsha memlekettik kirister departamenti alǵash ret shekaradan ótip jatqan sheteldikterge erekshe nazar aýdarylatynyn atap ótti. Vedomstvo mundaı adamdar JSN alǵannan keıin banktik shot ashyp, karta rásimdep, keıin olardy basqa adamdarǵa berip nemese syıaqy úshin jalǵa beretin jaǵdaılardy anyqtady. Keıinnen bul shottar men kartalar ınternet-alaıaqtyq jáne basqa da zańsyz qarjylyq operasıalar úshin paıdalanyldy.
Taldaý kórsetkendeı, dál Qazaqstanǵa alǵash ret kelgender bank rekvızıtterin úshinshi tulǵalarǵa berý kózine aınalady. Osyǵan baılanysty keden beketterinde aqparattyq-aldyn alý jumystary uıymdastyrylǵan: sheteldikterge bank quraldaryn berýge tyıym salynǵany jáne onyń saldary týraly eskertiledi.
Departament bógde adamdarǵa bank kartalaryn, shottardy jáne mobıldi bankıngke kirý derekterin bermeýdi, sondaı-aq syıaqy ýáde etilse de, shotty nemese kartany «jalǵa» berý usynystaryna kelispeýdi usynady. Kúdikti usynystar týyndaǵan jaǵdaıda quqyq qorǵaý organdaryna nemese banktiń senim telefonyna habarlasý qajet.
Buǵan deıin polısıa SMS-bombıngpen alaıaqtyqtyń jańa sqemasy týraly eskertken bolatyn, sondaı-aq sıfrlyq teńgeni engizýge baılanysty bıznes pen azamattarǵa arnalǵan ózgerister týraly habarlanǵan edi.