2026 jyldyń basynan beri Qazaqstanda Denge qyzbasynyń ákelingen bes jaǵdaıy tirkeldi, dep habarlaıdy infohub.kz.
Densaýlyq saqtaý mınıstrligi qazaqstandyqtardy Denge qyzbasynyń ákelingen jaǵdaılary týraly eskertti. Osyǵan baılanysty Sanıtarıalyq-epıdemıologıalyq baqylaý komıteti shetelge demalýǵa baratyn azamattarǵa usynystar jasady.
Saparda ózińizdi qalaı qorǵaýǵa bolady
«Aǵymdaǵy jyldyń basynan beri Qazaqstanda Denge qyzbasynyń ákelingen bes jaǵdaıy tirkeldi. Osyǵan oraı, tropıktik jáne sýbtropıktik klımatty elderge baratyn týrıserge qarapaıym erejelerdi saqtaý usynylady», – delingen vedomstvo habarlamasynda.
Olardyń qatarynda:
- kondısıonerleri men tereze-esikterinde moskıt torlary bar qonaqúılerdi nemese turǵyn úılerdi tańdaý;
- ekskýrsıalar men tabıǵat aıasynda serýendeý kezinde, ásirese, deneńizdi barynsha jaýyp turatyn kıim kıý (uzyn jeń, shalbar);
- balalardy jabyq kıim kıgizip, arbalar men kótergishterdi mindetti túrde moskıtke qarsy torlarmen jabý;
- jándikterdi qorqytý úshin repellentter qoldaný. Kúnnen qorǵaıtyn krem qoldanylsa, onyń ústine repellent jaǵý kerek.
Sımptomdary
Denge qyzbasynyń negizgi belgilerine eń aldymen qaltyraýmen birge 39–40 gradýsqa deıingi joǵary temperatýra, bulshyqetterde, súıekter men býyndarda qatty syrqyraý, sondaı-aq kóz aımaǵynda ótkir aýyrsyný jatady. Sonymen qatar, bul aýrý kezinde deneden mol bórtpe shyǵyp, bet pen moıyn qyzarady. Juqtyrǵandarda júrek aıný, jıi qusý, tábettiń joǵalýy, aıqyn álsizdik, bas aınalý, tersheńdik jáne lımfa túıinderiniń ulǵaıýy baıqalady.
«Eger sapardan oralǵannan keıin densaýlyǵyńyz nasharlasa, dereý dárigerge qaralyp, bolǵan elińiz týraly mindetti túrde habarlańyz», – delingen Komıtet habarlamasynda.
Buǵan deıin «Kýrsıv» Denge qyzbasyna qarsy Butantan-DV vaksınasy klınıkalyq synaqtardan ótkenin jazǵan bolatyn. Bir dozanyń aýrýdan jyldar boıy qorǵaı alatyny rastaldy. Buryn adamnyń aýyrǵan-aýyrmaǵanyna baılanysty birneshe doza qajet bolatyn.