Qańtardan maýsymǵa deıin Qazaqstandaǵy ortasha jalaqy jyldyq kórsetkishte 10,3%-ǵa ósti, alaıda ınflásıa bul ósimdi tolyǵymen joqqa shyǵardy. Nátıjesinde el Eýrazıalyq ekonomıkalyq odaqta naqty jalaqy ósimi boıynsha sońǵy orynǵa tústi, dep habarlaıdy infohub.kz saıty.
Buǵan deıin Qazaqstanda 2026 jyldyń ekinshi toqsanyndaǵy ortasha jalaqy 486 388 teńgeni quraǵany habarlanǵan bolatyn. Alaıda qańtar-maýsym aralyǵyn qarastyrsaq, Eýrazıalyq ekonomıkalyq komısıanyń derekteri boıynsha ortasha kórsetkish 480 461 teńgeni qurady.
Bir jyl ishinde nomınaldy jalaqy 10,3%-ǵa ósti, biraq ınflásıaǵa baılanysty naqty ósim bolmady – naqty tabys 0,6%-ǵa tómendedi. Osylaısha, Qazaqstan EAEO-da naqty jalaqysy baǵa ósimine ilese almaıtyn jalǵyz el boldy.
Odaqtyń basqa memleketterinde 2026 jyldyń qańtar-maýsym aralyǵyndaǵy naqty jalaqy dınamıkasy kelesideı boldy: Armenıa – plús 0,9%, Belarýs – plús 7,5%, Qyrǵyzstan – plús 15,3%, Reseı – plús 6,5%.
Ortasha jalaqynyń dollarlyq ekvıvalenti boıynsha Qazaqstan EAEO elderi arasynda úshinshi orynda: Reseı – 1 431 dollar (ortasha baǵam boıynsha 695 881 teńge), Belarýs – 1 026 dollar (498 934 teńge), Qazaqstan – 988 dollar (480 461 teńge), Armenıa – 830 dollar (403 621 teńge), Qyrǵyzstan – 615 dollar (299 068 teńge).
Halyq tabysynyń deńgeıin dálirek baǵalaý úshin analıtıkter medıandyq jalaqyny da qoldanady. 2026 jyldyń ekinshi toqsanynda Qazaqstanda ol 348 415 teńgeni qurady, bul jumys isteýshilerdiń jartysy osy somadan az alatynyn, al qalǵan jartysy kóp alatynyn bildiredi.