Kúz-qys kezeńi qarsańynda Qazaqstanda maýsymdyq aýrýlardyń órshýin boldyrmaýǵa baǵyttalǵan epıdemıaǵa qarsy sharalar kesheni qabyldandy. Respýblıkanyń bas memlekettik sanıtarıalyq dárigeri 2026–2027 jyldardaǵy epıdemıologıalyq maýsymǵa daıyndyqty retteıtin jyl saıynǵy qaýlyǵa qol qoıdy, dep habarlaıdy infohub.kz saıty.
Qujatqa sáıkes, 15 qyrkúıekten bastap elimizde halyqtyń osal toptaryn tumaýǵa qarsy vaksınasıalaý naýqany bastalady. 1 qazannan bastap medısına qyzmetkerleri úshin mindetti maska rejımi engiziledi, bul qarapaıym azamattarǵa ázirge qatysty emes.
Emhanalarda JRVI belgileri bar naýqastardy qabyldaý úshin oqshaýlanǵan súzgiler uıymdastyrylady. Sonymen qatar, júkti áıelder men bir jasqa deıingi balalardy ınfeksıa belgileri baıqalǵanda negizinen úıde qaraý josparlanýda.
Sonymen qatar, aýrýhanalar dári-dármek qoryn qamtamasyz etip, tósek qoryn baqylaýdy kúsheıtedi. Eger ınfeksıalyq jáne reanımasıa bólimsheleriniń júktemesi 85% jetse, qosymsha rezervtik oryndar ashylady.
Epıdemıologıalyq baqylaý da kúsheıtiledi: 1 qyrkúıekten bastap syrqattanýshylyq deńgeıi apta saıyn, al 1 qazannan bastap kún saıyn baqylanatyn bolady. Bul jaǵdaı nasharlaǵan kezde naqty shekteýlerdi jedel engizýge múmkindik beredi.
Elimizdiń oqý oryndarynda aldyn alý sharalary aıasynda kelýshilerdi baqylaý jáne tańerteńgi súzgiler engiziledi. JRVI órshigen jaǵdaıda kelesi sharalar qarastyrylǵan: synypta syrqattanýshylyq 20-30% qurasa, ol 7 kúnge medısınalyq baqylaýǵa alynyp, kabınetter arasyndaǵy aýysýlar toqtatylady. Eger syrqattanýshylyq 30%-dan assa, synyp tolyǵymen qashyqtan oqytýǵa kóshiriledi, al balabaqsha tobynyń jumysy toqtatylady.
Eske salaıyq, ótken jyldyń qarasha aıynda Astanada JRVI jáne tumaýmen syrqattanýshylyqtyń ósýi baıqaldy. Sol kezde kóptegen mekemeler men keńselerde koronavırýs pandemıasynyń alǵashqy jyldaryndaǵydaı maska rejımi qaıta engizilgen edi.