Qazaqstandyq AI-platforma Echelon Alpha úkimetke naryqtardy, kólik baǵyttaryn jáne salaaralyq ekonomıkalyq baılanystardy jedel taldaý úshin jasandy ıntellekt múmkindikterin usyndy... dep habarlaıdy infohub.kz.
Tusaýkeser QR Kólik mınıstrliginiń Sıtýasıalyq ortalyǵynda ótti. Premer-mınıstr Oljas Bektenov prezıdenttiń kólik salasyn sıfrlandyrý jónindegi tapsyrmalarynyń oryndalý barysymen jáne usynylǵan zamanaýı IT-sheshimdermen tanysty. Echelon Alpha kólik salasyna engizilip jatqan sıfrlyq ázirlemeler qatarynda kórsetildi.
«Prezıdent Qasym-Jomart Toqaev sıfrlyq qyzmetter memleketin odan ári qurýdyń basymdyǵyn belgiledi. Sıfrlandyrý men jasandy ıntellekt azamattarǵa, bızneske jáne memleketke naqty paıda ákelýi tıis. Úkimet aldynda ekonomıkanyń barlyq salasyna paıdaly II-sheshimderdi engizý qarqynyn jedeldetý mindeti tur. Búgin usynylǵan kólik salasyn tehnologıalyq transformasıalaý jobalaryn eń qysqa merzimde búkil el boıynsha tolyq aýqymda engizýdi tapsyramyn», — dep atap ótti Oljas Bektenov.
Echelon Alpha-nyń mańyzdy baǵyttarynyń biri — avıasıa. Júıe Qazaqstan arqyly ótetin tikeleı jáne tranzıttik reısterdiń perspektıvalyq jelisin modeldeıdi, baǵyttarǵa suranysty, ekonomıkany jáne básekege qabilettilikti baǵalaıdy. Model 190 hab arqyly shamamen 200 mln reıs negizinde oqytylǵan jáne 70+ ashyq derekkózden aqparatty jınaqtaıdy. Memlekettik bazalarmen salystyrý nátıjelerdiń 95% dáldigin kórsetti.
«Echelon Alpha naryq dınamıkasyn naqty ýaqytta taldaý jáne jyldam, dál sheshimder qabyldaýǵa negiz berý úshin jasandy ıntellektti paıdalanady. Bul Kólik mınıstrligimen birlesken joba: júıe ońtaıly baǵyt jelisin qurady jáne kez kelgen baǵyttyń komersıalyq tıimdiligin boljaıdy», — dep atap ótti Echelon Alpha kompanıasynyń bas dırektory Rahman Asambaev.
Platforma sondaı-aq jekelegen baǵyttardyń ekonomıkasyn egjeı-tegjeıli taldaýǵa múmkindik beredi. Mysaly, Haıdarabad — Astana — Máskeý baǵytyn modeldeý kezinde júıe 170-ten astam áýekompanıa esebin, bıletter men otyn quny týraly ózekti derekterdi eskeredi jáne áleýetti baǵytty qoldanystaǵy baǵyttarmen salystyrady.
Sonymen qatar tek komersıalyq tıimdilik qana emes, áýe jelisin damytýdyń memlekettik áseri — tikeleı jáne janama kirister, salyq túsimderi jáne ekonomıkaǵa áseri baǵalanady. Usynylǵan esepteýler boıynsha, áleýetti jıyntyq áser jylyna 70 mlrd teńgege jetýi múmkin, al bir jolaýshydan túsetin ekonomıkalyq áser shamamen $25 dep baǵalanady.
Degenmen, avıasıa — platforma múmkindikteriniń bir bóligi ǵana. Júıeniń negizinde ártúrli salalardyń derekterin biriktiretin jáne olardyń ózara áserin modeldeıtin «Eshelon» analıtıkalyq ózegi jatyr. Mysaly, munaı óńdeý kóleminiń ózgerýi otyn balansyna, salyq túsimderine, kólikke jáne ekonomıkanyń basqa sektorlaryna áser etýi múmkin. Sıfrlyq sheshim mundaı ózgeristerdiń saldaryn aldyn ala baǵalaýǵa jáne damý senarılerin qalyptastyrýǵa múmkindik beredi.
Osylaısha, Echelon Alpha úlken derekter massıvimen jumysty jedel senarılik taldaý formatyna aýystyrady, táýekelderdi tezirek baǵalaýǵa, jańa múmkindikterdi tabýǵa jáne ártúrli salalardyń ózara baılanysyn eskere otyryp sheshim qabyldaýǵa kómektesedi.
Oljas Bektenov qaýipsizdikti arttyrý, merzimderdi qysqartý jáne shyǵyndardy ońtaılandyrý úshin kólik jáne sabaqtas salalardyń aqparattyq júıeleriniń ıntegrasıasyn kúsheıtýdi tapsyrdy. Analıtıkalyq sheshimderdi engizý kórsetkishterdi tıimdirek paıdalanýǵa, ózgeristerdi jedel taldaýǵa jáne qabyldanatyn sheshimderdiń sapasyn arttyrýǵa yqpal etýi múmkin.