Qazaqstan álemniń eń básekege qabiletti ekonomıkalarynyń halyqaralyq reıtıńisinde 38-orynǵa turaqtap, TMD elderiniń ishinen osy tizimge engen jalǵyz memleket atandy. Bul týraly IMD World Competitiveness Center jarıalaǵan jahandyq zertteý qorytyndysynda aıtylǵan, dep habarlaıdy infohub.kz saıty.
Shveısarıalyq IMD World Competitiveness Center ortalyǵynyń jyl saıynǵy zertteýi álemniń 70 eliniń ekonomıkasyn tórt negizgi baǵyt boıynsha baǵalaıdy: ekonomıkalyq kórsetkishter, úkimet tıimdiligi, bıznes tıimdiligi jáne ınfraqurylym. Aǵymdaǵy tizimde Qazaqstan 65.4 bal jınap, 38-orynǵa ıe boldy.
Reıtıńtiń basynda álemniń jetekshi 10 eli ornalasty: Sıngapýr (100 bal), Gonkong (95.6 bal), Shveısarıa (95.3 bal), Taıvan (94.3 bal), BAÁ (94.1 bal), Danıa (94.1 bal), Irlandıa (94.1 bal), Nıderland (90.1 bal), Shvesıa (88.5 bal) jáne AQSh (86.8 bal).
Osy jahandyq tizimde Qazaqstan óz kórsetkishteriniń arqasynda Ispanıa, Portýgalıa, Polsha, Italıa jáne Argentına sıaqty birqatar memleketterdi basyp ozdy.
Eldiń tórt negizgi baǵyt boıynsha jeke profılinde mynadaı kórsetkishter tirkelgen: úkimet tıimdiligi (Government Efficiency) boıynsha Qazaqstan 63.0 bal jınap, 23-orynǵa turaqtady. Bıznes tıimdiligi (Business Efficiency) baǵytynda el 66.5 balmen 23-oryndy ıelendi.
Sonymen qatar ınfraqurylym (Infrastructure) kórsetkishi 46.2 baldy qurap, bul salada el 43-orynda ornalasty, al ekonomıkalyq kórsetkishter (Economic Performance) baǵyty boıynsha 43.5 balmen 57-orynǵa bekidi.
Zertteý aıasynda Qazaqstannyń negizgi makroekonomıkalyq kórsetkishteri de usynyldy: jalpy ishki ónim (JİÓ) kólemi 306.2 mıllıard dollardy qurap, bul kórsetkish boıynsha el 44-orynǵa turaqtady.
Satyp alý qabiletiniń parıteti (SAQP) boıynsha jan basyna shaqqandaǵy JİÓ 45,286.3 dollarǵa jetip, 43-oryndy bekitti. Eldiń JİÓ-niń naqty ósimi 6.5%-dy qurap, bul kórsetkish boıynsha el 6-orynda tur.
Bul rette halyq sany 20.4 mıllıon adamdy (32-oryn), jumyssyzdyq deńgeıi 4.6%-dy (31-oryn), al tutyný baǵalarynyń ınflásıasy 11.4%-dy (65-oryn) qurady.