Qazaqstannyń Energetıka mınıstrligi Jetildirilgen modeldik kelisimshart (JMK) boıynsha jumys isteıtin jer qoınaýyn paıdalanýshylardy sheteldik mamandardy birtindep jergilikti kadrlarmen almastyrýǵa mindetteýdi josparlap otyr. Alaıda eldegi iri jobalar — Teńiz, Qashaǵan jáne Qarashyǵanaq — bul talaptarǵa resmı túrde kirmeıdi, dep habarlaıdy infohub.kz saıty.
Úkimet otyrysynda energetıka mınıstri Erlan Aqkenjenov kadrlyq rezerv qalyptastyrýǵa, qazaqstandyq mamandardy daıarlaý men oqytýǵa, sondaı-aq jumysqa ornalastyrý kezinde olardyń kandıdatýralaryn basym qarastyrýǵa baǵyttalǵan baǵdarlamany usyndy. Kúrdeli jobalar úshin sheteldik kadrlardy qazaqstandyq mamandarmen almastyrý baǵdarlamasyn ázirleý jáne ony energetıka mınıstrligimen kelisý mindeti qarastyrylǵan.
Sonymen qatar, taý-ken óndirýshi kompanıalar óndiris kóleminiń 1%-yn qazaqstandyq kadrlardy oqytýǵa jumsaýǵa mindetti. 2023-2025 jyldary osy maqsattarǵa shamamen 62,7 mlrd teńge bólingen.
Degenmen, úsh iri joba — Teńiz (Tengizchevroil), Qashaǵan (NCOC) jáne Qarashyǵanaq (KPO) — JMK boıynsha emes, eski kelisimder boıynsha jumys isteıdi, biraq olar «kúrdeli» jobalar krıterılerine sáıkes keledi. Energetıka mınıstrliginiń baspasóz qyzmetinde sheteldik kadrlardy almastyrý baǵdarlamasy olarǵa qoldanylmaıtynyn naqtylady.
Eske salaıyq, eńbek mınıstri Asqarbek Ertaevtyń aıtýynsha, Qazaqstandaǵy tehnıkalyq bos jumys oryndarynyń 30-40%-y jumysshylarsyz qalyp otyr, sondyqtan kompanıalar sheteldik jumys kúshin tartýǵa májbúr. Jyl saıyn elge shamamen 300 myń sheteldik keledi.