«Mıss Álem – 2026» halyqaralyq baıqaýynda Qazaqstan atynan Baǵym Baltabaeva óner kórsetedi. Ol 2024 jyly Miss Qazaqstan ataǵyn jeńip alǵan bolatyn, dep habarlaıdy infohub.kz saıty.
Bıylǵy baıqaý Vetnamda ótip, oǵan júzden astam eldiń qatysýshylary jınalady. Miss Qazaqstan baıqaýynyń dırektory Ramına Ibragımova «Mıss Álem» — bul tek sulýlyq báıgesi emes, «Maǵynaly sulýlyq» fılosofıasy bar alań ekenin atap ótti. Munda tek syrtqy kelbet qana emes, jeke qasıetter men ózindik qaıyrymdylyq jobasyn tanystyra bilý de eskeriledi. Sondyqtan ulttyq irikteý jeńimpazdary jyl boıy qaıyrymdylyqpen belsendi aınalysady.
Baǵym Baltabaeva Óskemen qalasynan. Ol Sársen Amanjolov atyndaǵy Shyǵys Qazaqstan ýnıversıtetin pedagogıka mamandyǵy boıynsha bitirgen. Baıqaýǵa daıyndyq barysynda qyz jalǵyzbasty analar men qıyn ómirlik jaǵdaıǵa tap bolǵan balaly otbasylardy qoldaýǵa baǵyttalǵan qaıyrymdylyq jobalarǵa basymdyq berdi.
Baıqaýdyń mańyzdy kezeńi — ulttyq kostúmdi tanystyrý. Qazaqstan aqqý beınesi arqyly qazaq áıeliniń beınesin kórsetedi. Baǵymnyń aıtýynsha, onyń ulttyq kostúminiń negizine aqqý — tazalyq pen adaldyqtyń, rýhanı kúshtiń sımvoly alynǵan. Osy beıne arqyly ol qazaq áıeliniń náziktigin, abyroıyn jáne baı ishki álemin jetkizgisi keledi.
Qazaqstan ókili 7 tamyzda Vetnamǵa attanyp, bir aı boıy baıqaý baǵdarlamasyna, halyqaralyq mádenı is-sharalarǵa jáne «Mıss Álemniń» resmı sharalaryna qatysady. Otanǵa oralý 7 qyrkúıekke josparlanǵan.