Qazaqstanda 25 qyrkúıek Kaspı teńizindegi oqý-jattyǵý kezinde qaza tapqan áskerı qyzmetshilerdi eske alý kúni bolyp jarıalandy. Tıisti jarlyqqa Qazaqstan Prezıdenti Qasym-Jomart Toqaev qol qoıdy, dep habarlaıdy infohub.kz saıty.
Qaıǵyly oqıǵa 24 qyrkúıekte Mańǵystaý oblysynda boldy. Qazaqstan Respýblıkasy Qarýly Kúshteriniń Áskerı-teńiz kúshteri oqý-jaýyngerlik tapsyrmany oryndap jatqanda, Kaspı teńiziniń jaǵalaýynda aýa raıy kúrt nasharlap, jel kúsheıdi — áskerı qyzmetshilerdi teńizge alyp ketti.
Alǵashynda teńizde 19 áskerı qyzmetshi bolǵany, onyń toǵyzy qaza tapqany habarlandy. Alaıda 24 qyrkúıek keshke shyn máninde teńizge 17 adam alyp ketkeni belgili boldy: olardyń 12-si qaza tapty, úsheýin qutqarý múmkin boldy. Taǵy eki áskerı qyzmetshini izdeý jalǵasýda.
Qorǵanys mınıstrligi oqý-jattyǵý kezinde qaza tapqandardyń tizimin jarıalady. Oǵan 11 matros jáne bir aǵa leıtenant endi.
Bas prokýratýra áskerı qyzmetshilerdiń qaza bolýyna qatysty Aqtaý garnızonynda qylmystyq is qozǵalyp, tergelip jatqanyn málimdedi. Qaıǵyly oqıǵadan keıin úkimettik komısıa qurylyp, tótenshe jaǵdaı ornyna Premer-mınıstrdiń orynbasary Qanat Bozymbaev jiberildi.
Prezıdent Qasym-Jomart Toqaev Mańǵystaý oblysyndaǵy áskerı qyzmetshilerdiń qaza bolýyna baılanysty kóńil aıtyp, qaıǵyly oqıǵany tergeý jóninde tapsyrmalar berdi. Aqtaýda Qala kúnine oraı merekelik is-sharalar toqtatyldy.
Sonymen qatar Qanat Bozymbaev barlyq kináli laýazymdy tulǵalar «áreketi nemese áreketsizdigi» úshin jazalanatynyn ýáde etti. BAQ sondaı-aq keıbir qaza tapqandardyń demobılızasıaǵa deıin sanaýly kún qalǵanyn bildi.