Qazaqstandyq artısıkalyq júzý sheberleri Býdapeshte ótip jatqan 2026 jylǵy jasóspirimder arasyndaǵy álem chempıonatynda bir kúnde eki medal jeńip alyp, erekshe jetistikke jetti, dep habarlaıdy infohub.kz saıty.
Aralas dýetterdiń erkin baǵdarlamasynda Iasmına Islamova men Aldıar Ramazanov 248,1058 upaı jınap, ekinshi orynǵa ıe boldy. Olar tek 263,2992 upaı jınaǵan ıspandyq Arlet Arnan Santakrýs pen Eneko Sanches Agılar dýetinen ǵana qalys qaldy. Al qola júldeni 246,9850 upaımen japondyq Heızo Aıtaka men Manamı Dodo ıelendi.
Bul kúmis Qazaqstan úshin jasóspirimder arasyndaǵy álem chempıonattarynda mıkst-dýetterdegi alǵashqy medal boldy, sondyqtan ol tarıhı jetistik sanalady.
Sol kúni ulttyq qurama akrobatıkalyq baǵdarlamada da kózge tústi. Sofıa Ishenko, Iasmına Islamova, Daıana Jamanchalova, Makpal Kalmýrza, Polına Merzlákova, Aldıar Ramazanov, Aıganym Saım jáne Anastasıa Voronkovadan quralǵan Qazaqstan quramasy 203,0926 upaı jınap, ekinshi orynǵa ıe boldy.
Bul pánde jeńisti 232,2147 upaımen Reseı quramasy baǵyndyrsa, qola júldeni 200,9777 upaımen Belarýs komandasy aldy.
Osylaısha, Qazaqstan quramasynyń qorjynynda osy týrnırde úsh medal bar. Buǵan deıin Vıktor Drýzın jeke tehnıkalyq baǵdarlamada qola júldeger atanǵan bolatyn.
Vengrıa astanasyndaǵy jarys 16 tamyzda aıaqtalady.