Qazaqstan quramasy Vengrıada ótip jatqan jasóspirimder (U19) arasyndaǵy sý sportynan álem chempıonatynda eki ret úzdik ondyqqa endi, dep habarlaıdy infohub.kz.
Toptyq tehnıkalyq baǵdarlamada qazaqstandyq komanda segizinshi orynǵa ıe boldy, al Daıana Djamanchalova men Makpal Kalmýrza dýeti áıelder dýetteri arasyndaǵy tehnıkalyq baǵdarlamada onynshy orynǵa turaqtady.
Toptyq jarystarda el namysyn Salıma Aqylbek, Sofıa Ishenko, Polına Merzlákova, Aıganym Saım, Anastasıa Voronkova, Tahmına Zaırova, Djamanchalova jáne Kalmýrza qorǵady. Sınhronshylar 250,1 upaı jınap, qorytyndy hattamada segizinshi satyǵa ornalasty.
Bul dısıplınada altyndy Reseı quramasy 290,1 upaımen jeńip aldy. Ekinshi oryndy Qytaı (283,0 upaı) ıelendi, al úzdik úshtikti Ispanıa (273,0 upaı) tuıyqtady.
Áıelder dýetteri arasyndaǵy tehnıkalyq baǵdarlamada Djamanchalova men Kalmýrza tóreshilerden 265,1 upaı alyp, 27 dýettiń ishinde onynshy orynǵa ıe boldy.
Jeńisti reseılikter Krıstına Chehanova men Anastasıa Sıdorına – 300,2 upaımen baǵyndyrdy. Kúmis Qytaı ókilderi He Chjıen men Chjoý Kýnıge buıyrdy – 289,7. Úshinshi oryndy ıspandyqtar Naııa Alvares pen Danıela Sýares – 289,3 upaımen ıelendi.
Eki jarys kúninen keıin Qazaqstan quramasynyń qorjynynda bir medal bar. Ony erler arasyndaǵy tehnıkalyq soloda qola júldeger atanǵan Vıktor Drýzın jeńip aldy.
Jasóspirimder (U19) arasyndaǵy álem chempıonaty Býdapeshtte (Vengrıa) 12-16 tamyz aralyǵynda ótip jatyr. Oǵan 35 elden 300 sportshy qatysýda. Barlyǵy 11 medal jıyntyǵy sarapqa salynady. Qazaqstan atynan 12 sportshy synǵa túsedi.