Shildedegi ystyq Qazaqstannyń birneshe qalasynda temperatýra maksımýmdaryn jańartty. Túrkistanda aýa +47,6 gradýsqa deıin qyzdy, dep habarlaıdy infohub.kz.
«Qazgıdromet» derekteri boıynsha, shildede eldiń basym bóliginde aýa temperatýrasy klımattyq normadan 1–4 gradýsqa joǵary boldy. Almatyda bir aı ishinde tórt jańa maksımým tirkeldi: 16 shildede temperatýra +38 gradýsqa, 17 shildede +39,2-ge, 18 shildede +40-qa, al 20 shildede +41,5 gradýsqa jetti.
Shymkentte aýa +45,2 gradýsqa deıin qyzdy. Munda 1915 jylǵy eki temperatýra rekordy birden jańartyldy: 16 shildedegi kórsetkish +41,1-den +45,2 gradýsqa, al 17 shildede +40,1-den +45,2 gradýsqa kóterildi.
Joǵary temperatýra basqa qalalarda da baıqaldy. Astanada 14 shildede termometr baǵandary +38,6 gradýsqa, al Óskemende 16 shildede +39,7-ge kóterildi.
Qyzylordada 17 shildede temperatýra +45,2 gradýsqa jetti. Túrkistanda odan da joǵary kórsetkish tirkeldi: 18 shildede aýa +47,6 gradýsqa deıin qyzdy. 2019 jyly belgilengen aldyńǵy maksımým +43,7 gradýs bolǵan edi.
Shilde tek ystyq ákelgen joq. Keıbir aýdandarda jaýyn-shashyn mólsheri klımattyq normadan aıtarlyqtaı asyp tústi. Máselen, Túrkistan oblysyndaǵy Jetisaıda bir aı ishinde klımattyq normadan 15 ese kóp jaýyn-shashyn tústi.