Qazaqstan Úkimeti otandyq jeńil ónerkásipti qoldaý úshin sharalar keshenin ázirledi. Óndirýshilerdiń memlekettik satyp alýǵa qoljetimdiligi keńeıtiledi, shıkizatty lokalızasıalaýǵa jáne mektep formasynyń sapasyna qoıylatyn talaptar kúsheıtiledi, sondaı-aq sertıfıkattaý shyǵyndary azaıady, dep habarlaıdy infohub.kz.
Sala ókilderimen kezdesýde atap ótilgendeı, sharalardyń biri memlekettik qorǵanys tapsyrysyna qatysty. Jeńil ónerkásip taýarlaryn satyp alý kezinde shıkizattyń el ishindegi qunyna qoıylatyn talaptardy kezeń-kezeńimen arttyrý usynylady. Bul qazaqstandyq shıkizatty paıdalanýdy arttyrýǵa jáne otandyq óndirýshilerdiń turaqty júktelýin qamtamasyz etýge múmkindik beredi.
Otandyq kásiporyndardyń múmkindikterin memlekettik satyp alý salasynda da keńeıtý josparlanýda. Ol úshin «Eńbek» RMK arqyly bir kózden satyp alynatyn jeńil ónerkásip taýarlarynyń tizbesin qaıta qaraý usynylady. Tizbede uıymnyń ishki qajettilikterine arnalǵan ónimderdi ǵana qaldyryp, otandyq kásiporyndarǵa memlekettik satyp alýǵa keńirek qoljetimdilik ashý usynylady.
Ózgerister mektep formasyna da áser etedi. Onyń sapasyna qoıylatyn talaptardy kúsheıtip, ulttyq standarttarǵa sáıkestigin normatıvtik turǵydan bekitý usynylady.
Sondaı-aq sertıfıkattaý men zerthanalyq synaqtardyń quny máselesi qaraldy. Bıznes ókilderi buǵan deıin memlekettik satyp alýǵa qatysý úshin ónimdi sertıfıkattaýdyń qymbattyǵyn atap ótken bolatyn. Sala usynystaryn eskere otyryp, ónimdi synaýǵa arnalǵan tirkelgen tarıfterdi kózdeıtin ádistemeni ázirleý sheshildi. Bul qyzmet qunyn neǵurlym ashyq etip, óndirýshilerdiń shyǵyndaryn azaıtýǵa tıis.
«Jedel sharalardy zańǵa táýeldi aktiler deńgeıinde, al júıeli sharalardy zańnamaǵa ózgerister engizý arqyly júzege asyrý josparlanýda. Sonymen qatar, jeńil ónerkásipti damytýdyń keshendi jospary aıasynda Salyq kodeksine jáne basqa da zańnamalyq aktilerge túzetýler paketi daıyndaldy», — dep atap ótti Úkimette.
Negizgi quraldardyń biri retinde lokalızasıany arttyrý týraly kelisimdi usyný josparlanýda. Tıisti mindettemelerdi óz moınyna alǵan kásiporyndar salyqtyq jeńildikterge, onyń ishinde obektilerdiń ornalasqan jerine qaramastan, eksterrıtorıaldyq normasynyń arqasynda ıe bola alady.
Buǵan deıin «Kýrsıv» Qazaqstanda kıim óndirisi 136 paıyzǵa óskenin jazǵan bolatyn. 2025 jyldyń qorytyndysy boıynsha óndiris kólemi 22,6 paıyzǵa ósip, 259,5 mlrd teńgeni qurady. Ósýdiń negizgi qozǵaýshysy — 159 mlrd teńge kólemindegi toqyma salasy.
«Sala óńdeý ónerkásibiniń eń jyldam damyp kele jatqan segmentteriniń biri bolyp qala beredi», — dep túsindirdi Ónerkásip mınıstrliginde.