Jambyl oblysynda bala kezinen múgedek er adam anasy qaıtys bolǵannan 34 jyl ótken soń asyraýshysynan aıyrylý boıynsha járdemaqy tóleýden bas tartýǵa qatysty sotqa júgindi. Daý medıasıa kómegimen beıbit jolmen sheshildi, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, bala kezinen múgedek er adam halyqty áleýmettik qorǵaý salasyndaǵy retteý jáne baqylaý komıtetiniń departamentine talap aryzben júgingen. Talapkerdiń anasy 1992 jyly, ol kámeletke tolmaǵan kezde qaıtys bolǵan. Ol anasymen birge turyp, tolyq asyraýynda bolǵan. 1994 jyly oǵan bala kezinen III top múgedektigi resmı túrde belgilengen.
Talapker departamentke asyraýshysynan aıyrylý boıynsha járdemaqy taǵaıyndaý týraly ótinishpen júgingen, biraq bas tartylǵan. Bas tartýdyń negizderiniń biri – anasy qaıtys bolǵan kezde onyń asyraýynda bolǵanyn qujattyq rastaýdyń bolmaýy, sondaı-aq múgedektiktiń keıinirek resmı túrde belgilenýi.
Bas tartýmen kelispegen talapker sotqa júginip, ol kámeletke tolmaǵandyqtan ózin ózi qamtamasyz ete almaǵanyn, al múgedektiktiń bala kezinen belgilengenin kórsetken.
Sotta tatýlasý rásimderin qoldaný nátıjesinde taraptar daýdy beıbit jolmen retteýge sheshim qabyldap, medıatıvtik kelisim jasasty. Kelisim sharttary boıynsha talapker járdemaqy taǵaıyndaý týraly ótinishpen departamentke qaıta júginýge mindettendi. Óz kezeginde vedomstvo ótinishti tıisti túrde qarap, ol boıynsha ońtaıly sheshim qabyldaýǵa mindettendi.
Kelisim sotpen bekitilip, talapkerge tólengen memlekettik baj qaıtaryldy. Sot uıǵarymy zańdy kúshine endi.