Qazaqstandyq mamandar Dýshanbedegi áriptesterimen tájirıbe bólisip, eki kún ishinde kúrdeli otalar jasap, júzden astam konsýltasıa ótkizdi, dep habarlaıdy infohub.kz saıty.
Sapar aıasynda qazaqstandyq dárigerler Ulttyq travmatologıa jáne ortopedıa ǵylymı ortalyǵynyń mamandary Tájikstandaǵy naýqastardy emdeýde zamanaýı az ınvazıvti ádisterdi qoldandy. Jumys birneshe baǵytta júrgizildi: omyrtqa hırýrgıasy, aıaq pen tobyq býynynyń ortopedıasy, sondaı-aq artroskopıa.
Eń kúrdelisi omyrtqaǵa jasalǵan otalar boldy. Bólim meńgerýshileri Murat Baıdarbekov pen Seıdaly Abdalıev bel omyrtqasynyń degeneratıvti stenozy, aıqyn túbirshik aýyrsyný sındromy bar naýqas áıelge ota jasady. Hırýrgtar eki deńgeıde (L4-L5 jáne L5-S1) júıke qurylymdaryna dekompressıa jasap, transpedıkýlárlyq júıe men denearalyq keıdjder ornatty.
Taǵy bir ota skolıozy bar 13 jastaǵy naýqas qyzǵa jasalyp, oǵan omyrtqanyń kúrdeli deformasıasy túzetildi.
Aıaq jáne tize býyny hırýrgıasy salasynda №2 ortopedıalyq bólimniń meńgerýshisi Qaırat Tajın tobyq býynynyń III dárejeli posttravmatıkalyq artrozy jáne aıqyn aıaq deformasıasy bar 24 jastaǵy naýqasqa ota jasady. Jas jigitke deformasıany túzetý jáne aıaqty turaqtandyrý úshin úsh býyndy artrodez jasaldy.
Taǵy bir naýqas áıelge tobyq býynynyń turaqsyzdyǵyna baılanysty Ýotson boıynsha plasıka jasaldy. Az ınvazıvti aralasýdy artroskopıa jáne sporttyq jaraqat bóliminiń meńgerýshisi Nurjan Asanov oryndady. Ol sondaı-aq tize býynyna eki artroskopıalyq ota jasady: medıaldy menısk tigisi jáne kapsýla-baılam apparatynyń plasıkasy.
«Tájikstandaǵy eki kúndik jumys barysynda qazaqstandyq mamandar júzden astam konsýltasıa ótkizip, on shaqty hırýrgıalyq ota jasady», — delingen Densaýlyq saqtaý mınıstrliginiń habarlamasynda.