AQSH-tyń Iýdjın qalasynda ótip jatqan jeńil atletıkadan jastar arasyndaǵy álem chempıonatynyń (U20) ekinshi kúninde qazaqstandyq sportshylar fınaldyq jarystarǵa óte almady, dep habarlaıdy infohub.kz.
Kırıll Savchenko 400 metrge kedergilermen júgirýde aldyn ala jarysta jetinshi nátıje kórsetip, 53,88 sekýndpen márege jetti. Onyń jeke rekordy – 52,54 sekýnd, alaıda bul da kelesi kezeńge ótýge jetpeıtin edi: kedergilermen júgirýde kelesi aınalymǵa shyǵý úshin barbadostyq Rashad Gıbsonnyń ýaqyty – 51,74 sekýnd – baǵdar boldy.
Shyǵys Qazaqstan oblysynan shyqqan Sofá Kıdenko 400 metr qashyqtyqta 56,29 sekýnd nátıjemen altynshy bolyp márege jetti. Al onyń jeke rekordy – 54,75 sekýnd – besinshi orynǵa jetkizer edi, biraq jarysty jalǵastyrý úshin 54,31 sekýndtan jyldam júgirý qajet boldy.
Gleb Gladılov úsh qarǵyp sekirýde úshinshi áreketinde 14,75 metr nátıje kórsetti, al fınalǵa ótý úshin 15,69 metrge sekirý kerek edi. Shymkenttik 19 jastaǵy sportshynyń jeke rekordy – 15,47 metr.
Aldyńǵy kúni syryqpen sekirýshi Anna Cherkashına 4,10 metr bıiktikti baǵyndyryp, Qazaqstan úshin rekord jasap, fınalǵa shyqty. Almatylyq sportshyny qosa alǵanda, 13 sportshy 8 tamyzda osy túrdegi jarysta baq synaıdy.
AQSH-ta ótip jatqan jastar arasyndaǵy álem chempıonatynda Qazaqstan quramasy normatıvterdi oryndaǵan alty er jáne bes áıel sportshymen usynylǵan. Bul – 2008 jyly Polshanyń Bydgosh qalasynda ótken jastar arasyndaǵy álem chempıonatynan keıingi eń kóp quram (ol kezde 12 qatysýshy bolǵan). Eki jyl buryn Perý astanasy Lımada bes sportshymyz bolsa, 2022 jyly Kolýmbıanyń Kalı qalasynda ótken álem chempıonatynda tórteýimiz bolǵan edi.
Qazaqstan 1994 jyldan beri jastar arasyndaǵy jeńil atletıkadan álem chempıonattaryna jeke komandamen qatysyp keledi. Osy ýaqyt ishinde bizdiń sportshylar 16 týrnırdiń eshqaısysyn qaldyrmaı, barlyǵyna qatysty, alaıda áli birde-bir ret júldeli orynǵa kóterilgen joq.