Jyl basynan beri «Qazaqtelekom» Aqtaýdaǵy segiz turǵyn úıdi óziniń optıkalyq ınfraqurylymyna qosyp úlgerdi, al jaqyn arada taǵy tórt turǵyn kesheni GPON tehnologıasyna qol jetkizedi. Jańadan qosylǵan nysandardyń biri — 240 páterge arnalǵan «Aısar» turǵyn kesheni, dep habarlaıdy infohub.kz saıty.

«Aısar» turǵyn kesheninde turatyn Zýlpıa Arahovanyń otbasy úshin úıdiń optıkaǵa qosylýy oqý jylynyń bastalýymen tuspa-tus keldi. Otbasynda ınternetti belsendi túrde balalar paıdalanady — oqý, aqparat izdeý jáne onlaın sabaqtar úshin.

«Qazir oqý jyly bastalǵandyqtan, ınternet balalarǵa óte qajet. Olar úı tapsyrmasyn daıyndaıdy, qosymsha aqparat tabady, onlaın sabaqtarǵa qatysady. Sondyqtan bizdiń otbasy úshin ınternettiń jyldam ári turaqty bolýy mańyzdy. Endi mundaı qyzmetterdiń bizdiń úıde de qoljetimdi bolǵany óte yńǵaıly», — dedi Zýlpıa Arahova.

GPON tehnologıasy optovolokondy jelini abonenttiń páterine tikeleı tartýdy kózdeıdi. Bul bir jeli arqyly birneshe qyzmetti bir ýaqytta paıdalanýǵa múmkindik beredi — úı ınterneti, teledıdar jáne basqa da sıfrlyq servıster.

Jańa turǵyn keshenderden bólek, «Qazaqtelekom» jeke sektorda da optıkalyq jelini keńeıtýdi josparlap otyr. Kelesi jobalardyń biri Munaıly aýdanyndaǵy Qyzyltóbe aýylynda júzege asyrylady, onda shamamen 1200 úıge GPON-ǵa qosylý múmkindigin qamtamasyz etý josparlanýda. Joba shamamen 800 port salýdy kózdeıdi.

«Biz optıkalyq jelini Aqtaýdyń ózinde de, mańaıdaǵy eldi mekenderde de damytýdy jalǵastyryp jatyrmyz. Qazir qalada taǵy 4 turǵyn keshenin qosýǵa daıyndap jatyrmyz. Kelesi úlken jumys kólemi Qyzyltóbede — onda jeke sektor týraly sóz bolyp otyr. Biz úshin zamanaýı ınfraqurylym tek jańa kópqabatty úılerde ǵana emes, sonymen qatar sapaly symdy ınternetke muqtaj jeke úı turǵyndary turatyn jerlerde de paıda bolýy mańyzdy», — dedi «Qazaqtelekomnyń» bólshek bıznes dıvızıonynyń ınstallásıalyq jumystar departamenti Aqtaý qalasy sehynyń bastyǵy Baýyrjan Kalıev.

Jańa nysandardy qosý aldynda kompanıa mamandary turǵyndarmen kezdesip, qoljetimdi qyzmetter boıynsha keńes beredi jáne ótinimder jınaıdy. Mundaı format jelini damytý kezeńinde suranysty baǵalaýǵa jáne qosylý qajettiligin anyqtaýǵa múmkindik beredi.