2026 jyly Qazaqstanda shamamen 23 mıllıon tonna astyq jınalady dep kútilýde. Bul kórsetkish byltyrǵy rekordtyq deńgeıden tómen bolǵanymen, kópjyldyq ortasha kólemnen joǵary bolady. Bul týraly Aýyl sharýashylyǵy mınıstrligi habarlady, dep jazady infohub.kz saıty.
Aýyl sharýashylyǵy vıse-mınıstri Nazgúl Hatepovanyń naqtylaýynsha, el orta eseppen jyl saıyn 18–19 mıllıon tonna shamasynda astyq jınaıtyn. Bıylǵy maýsymda nátıje odan joǵary bolady dep kútilýde.
«Bıylǵy jyly kópjyldyq ortasha kólemnen joǵary bolady dep boljap otyrmyz. Sońǵy 10, 5, 15 jyldaǵy ortasha ónimdi alsaq, orta eseppen 18–19 mıllıon tonna astyq jınaǵanymyzdy kóremiz. Bıylǵy kólem odan joǵary bolady dep josparlap otyrmyz, árıne, bul kólem byltyrǵydan tómen», — dedi zammınıstra úkimettegi brıfıńte.
Qazirgi tańda dıqandar shamamen 20 mıllıon tonna astyq jınap qoıdy. Egin jınaý naýqany shamamen 83%-ǵa oryndaldy.
Aýyl sharýashylyǵy mınıstrliginde jınaý aıaqtalǵan soń jalpy ónim 23 mıllıon tonnaǵa jetedi dep kútip otyr.
«Ótken eki jyl rekordty boldy — bastapqy salmaqta 27,5 mıllıon tonna. Jalpy, búginde 20 mıllıon tonna shamasynda jınadyq, bul 83 paıyz, bıyl shamamen 23 mıllıon tonna astyq jınaımyz dep josparlap otyrmyz», — dep qosty Hatepova.
Sonymen qatar «Qazgıdromet» Qazaqstannyń negizgi astyq ósiretin aımaqtarynda egin jınaý kezeńinde aýa raıy qıyn bolatynyn eskertti.
Buǵan deıin «Kýrsıv» Qazaqstanda sıyr etiniń baǵasy ne bolatynyn jazǵan edi.