2024 jylǵy 26 qyrkúıekten bastap Qazaqstanda jeke tulǵalardyń basqa elderden avtomobıl ákelýine qatysty jańartylǵan erejeler kúshine endi. Ózgerister rásimdeletin qujattar sanyna, kólik jasyna jáne birqatar tehnıkalyq talaptarǵa qatysty boldy, dep habarlaıdy infohub.kz saıty.
Jańa normalarǵa sáıkes, jeke tulǵa kólik quralynyń qaýipsizdigi týraly kýálikti (KQQS) bir kúntizbelik jyl ishinde bir ret qana ala alady. Bul shekteý úshinshi elderden jeke paıdalaný úshin ákelinetin jeńil avtomobılderge, shaǵyn avtobýstarǵa jáne jeńil júk kólikterine qatysty.
Sonymen qatar, avtomobılmen birge jalpy salmaǵy 3,5 tonnaǵa deıingi bir tirkeme, sondaı-aq turýǵa nemese avtotýrızmge arnalǵan «úı-tirkeme» túrindegi tirkeme ákelýge ruqsat etiledi. Avtomobıl tasymaldaýǵa arnalǵan tirkeme bul erejeden tys qalady.
2024 jyly Qazaqstanda avtomobıl ákelý múmkindikterin shekteıtin túzetýler qabyldanǵan bolatyn. Jeke tulǵalar avtony tek KQQS boıynsha, jeke paıdalanýǵa arnalǵan kedendik mólsherlememen 48%-dan nemese tekshe santımetrine 1,5 eýrodan bastap birlesken tólem túrinde ákele alatyn. Zańdy tulǵalarǵa «kólik quraly túrin maquldaý» (KQTM) qujaty talap etildi. Bul sharalar sur ımportqa qarsy kúreske baǵyttalǵan.
Derekkózde atap ótilgendeı, qyrkúıek sońynda shekteý basqa da normatıvtik-quqyqtyq aktide qosymsha jazylyp, odan da qatań talaptarmen tolyqtyryldy. «2024 jylǵy 26 qyrkúıekten bastap Qazaqstanda kólik quralynyń qaýipsizdigi týraly kýálikterdi (KQQS) rásimdeý erejelerine ózgerister kúshine endi. Saýda mınıstrligi jarıalaǵan qujatqa sáıkes, endi jeke tulǵa úshinshi elderden jeke paıdalaný úshin ákeletin jeńil avto, shaǵyn avtobýs nemese jeńil júk kóligine KQQS bir kúntizbelik jyl ishinde bir retten artyq berilmeıdi», — delingen derekkózde.
Jańa erejeler KQQS rásimdeýge tyıym salynǵan avtomobılder tizimin de belgileıdi. Oǵan jeke paıdalanýǵa ákelinbegen (jolaýshylar kedendik deklarasıasy boıynsha emes) kólikter; ruqsat etilgen parametrlerge saı kelmeıtin kólik quraldary (Eýro-4 standarty, ol Eýro-5-ke aýystyrylýy múmkin); EAEO elderinen jeke tulǵa ákeletin 5 jyldan asqan avtomobılder (mundaı kólikterge elektrondyq pasporttar rásimdelmeıdi); sondaı-aq basqarý organdary oń jaqtan sol jaqqa qaıta jabdyqtalǵan kólik quraldary kiredi.
Osylaısha, osy ólshemsharttarǵa saı keletin avtomobılderdi jeke tulǵalar Qazaqstanǵa ákele almaıdy.
Buǵan qosa, jańartylǵan erejeler rásimdeý tártibin qatańdatady. «Jańartylǵan erejelermen KQQS rásimdeý kezinde shanaqqa (ramaǵa) soǵylǵan VIN-kod (Vehicle Identification Number), óndirýshiniń sáıkestendirý taqtaıshasy, sondaı-aq mańdaısha áınektiń astyndaǵy qosymsha VIN tańbalaýy (bar bolsa) tirkelýi tıis dep belgilenedi. Synaq zerthanasynda avtony tekserý prosesi, onyń ishinde SOS túımesiniń jumys isteýin tekserý tórt jaqtan mindetti túrde beınege jazylady. Tekserý materıaldary qaýipsizdik týraly kýálik berilgen kúnnen bastap keminde 3 jyl saqtalady», — dep habarlaıdy Kolesa.kz.
Eske salaıyq, buǵan deıin Almaty turǵyndaryna aıyppul turaǵyna alynǵan avtomobılderdi 4 qazanǵa deıin alyp ketýge keńes berilgen — osy kúnnen bastap jańa tarıfter kúshine enedi. Sondaı-aq Qazaqstanda avtomobılder arzandaǵany, qyrkúıek sońynda avtolızıng baǵdarlamalarynyń mólsherlemeleri bekitilgeni habarlanǵan bolatyn.