Qazaqstan boks quramasynyń bas bapkeri Eldos Saıdalın Ulttyq olımpıada komıtetine bergen suhbatynda Azıa oıyndaryna qatysatyn komandanyń túpkilikti quramyn atady. Oıyndar 19 qyrkúıek pen 4 qazan aralyǵynda Japonıada ótedi, dep habarlaıdy infohub.kz saıty.
Saıdalınniń aıtýynsha, áıelder quramasyna Alýa Balkıbekova (51 kelige deıin), Nazym Qyzaıbaı (54 kelige deıin), Vıktorıa Grafeeva (60 kelige deıin), Aıda Abıkeeva (65 kelige deıin) jáne Natalá Bogdanova (75 kelige deıin) endi.
«Qatysýshylar tizimin jasaý kezinde ótken jylǵy álem chempıonatynyń nátıjeleri, sondaı-aq bıylǵy maýsymdaǵy álem kýbogy kezeńderiniń qorytyndylary eskerildi», — dep atap ótti bapker.
Maman Azıada áıelder boksy qarqyndy damyp jatqanyn, negizgi qarsylastar retinde Úndistan men Qytaı quramalaryn atady.
«Qazir bizdiń komanda AQSH-ta oqý-jattyǵý jıynyn ótkizip jatyr. 4 tamyzda Qazaqstanǵa qaıtamyz. Odan keıin sportshylar jeke baǵdarlama boıynsha daıyndalyp, azdap demalady. Kelesi jıyn 16 tamyzda bastalady. Oǵan Reseı men AQSh quramalary qatysady. Al 9 qyrkúıekte Japonıaǵa attanamyz, onda daıyndyqtyń qorytyndy kezeńi ótedi. Beıimdelýden ótip, oıyndarǵa daıyndalamyz», — dedi Saıdalın.
Bapkerdiń aıtýynsha, qazaqstandyq sportshylardyń kóńil kúıi jaqsy, jaraqattary joq. Komanda Azıa oıyndarynda sátti óner kórsetýge úmit artyp otyr.