Qazaqstan azamattary Qytaıda emtıhan tapsyrmaı-aq kólik júrgize alady, al QHR azamattary Qazaqstanda osy múmkindikke ıe bolady. QR İshki ister mınıstrligi eki el arasyndaǵy júrgizýshi kýálikterin ózara taný jáne aıyrbastaý týraly kelisim jobasyn daıyndady... dep habarlaıdy infohub.kz.
Normatıvtik quqyqtyq aktige sáıkes, Qazaqstan men Qytaı azamattary qabyldaýshy eldiń aýmaǵynda jeńil kólik quraldaryn basqarý úshin qoldanystaǵy ulttyq júrgizýshi kýálikterin paıdalaný quqyǵyna ıe bolady.
Negizgi jańashyldyq — qujattardy tikeleı aıyrbastaý múmkindigi. Ýaqytsha nemese turaqty túrde seriktes memleket aýmaǵynda júrgen eki el azamattary qaıta oqýdan ótpeı-aq jáne biliktilik emtıhandaryn tapsyrmaı-aq júrgizýshi kýálikterin aıyrbastaı alady. Bul rásim qabyldaýshy taraptyń ishki zańnamasynyń talaptaryn saqtaı otyryp júzege asyrylady.
Úkimetaralyq kelisimniń maqsaty — ákimshilik rásimderdi jeńildetý, sondaı-aq Qazaqstan Respýblıkasy men Qytaı Halyq Respýblıkasy arasyndaǵy kólik, týrısik jáne iskerlik baılanystardy yntalandyrý.
Jobany iske asyrý jáne qujattarmen almasý kelisimge resmı qol qoıylǵannan, barlyq memleketishilik rásimder aıaqtalǵannan jáne qujat zańdy kúshine engennen keıin bastalady.
Eske salaıyq, 25 shildede Taıaý Shyǵys elderimen osyǵan uqsas dıplomatıalyq kelisimder jasalǵany habarlanǵan bolatyn. Qol qoıylǵan qujattarǵa sáıkes, qazaqstandyqtar Birikken Arab Ámirlikteriniń (BAÁ) aýmaǵynda qosymsha teorıalyq jáne praktıkalyq emtıhandar tapsyrmaı-aq ulttyq júrgizýshi kýálikterin aıyrbastaý quqyǵyna ıe boldy.