Úkimette Qazaqstan men Reseı shekarasynda kólik quraldarynyń ótýin jyldamdatý sharalary kúsheıtiletini habarlandy, dep málimdeıdi infohub.kz saıty.
Premer-mınıstrdiń birinshi orynbasary Nurlybek Nalıbaev avtomobıl ótkizý pýnktterindegi ahýal men kólik aǵynyn uıymdastyrý tıimdiligin arttyrýǵa arnalǵan keńes ótkizdi. Keńes barysynda Ulttyq qaýipsizdik komıtetiniń Shekara qyzmetiniń memlekettik shekaradaǵy jaǵdaı jáne «Álimbet», «Jaısan» jáne «Syrym» ótkizý pýnktteri arqyly avtokólik quraldarynyń jedel ótýin qamtamasyz etý boıynsha qabyldanyp jatqan sharalar týraly baıandamasy tyńdaldy.
Qazaqstan tarapyndaǵy ótkizý pýnktteri táýlik boıy shtattyq rejımde jumys isteıtini atap ótildi. Qazaqstan aýmaǵy arqyly tranzıttik tasymaldaýdyń maýsymdyq ósýin eskere otyryp, Eýrazıalyq ekonomıkalyq odaqtyń ishki kontýryndaǵy avtomobıl ótkizý pýnktterin ýaqtyly jańǵyrtý baqylaýy kúsheıtildi. Bul baqylaýdan ótý ýaqytyn qysqartýǵa múmkindik beredi.
Júk tasymaldaýshylardyń jaılylyǵy úshin basym ótkizý pýnktteriniń janynda júrgizýshilerge arnalǵan servıstik kútý aımaqtary qurylady, bul shekaralyq baqylaýdy kútý kezeńinde júrgizýshilerdiń turýyna qolaıly jaǵdaı jasaıdy. Tıisti jumystardy 2027 jyly aıaqtaý josparlanýda.
Keńes qorytyndysy boıynsha avtokólik quraldarynyń úzdiksiz jáne jedel ótkizilýin qamtamasyz etý jóninde tapsyrmalar berildi. Osy maqsatta Kólik mınıstrligi múddeli memlekettik jáne jergilikti atqarýshy organdarmen birlesip jedel shtabtar qurdy. Ahýal úkimettiń baqylaýynda.