Qazaqstan Reseı men Ýkraına arasyndaǵy janjaldy retteý boıynsha kelissózderge alań usynýǵa daıyn, eger tıisti suraý tússe, dep habarlaıdy infohub.kz saıty.
Qazaqstan Syrtqy ister mınıstrliginiń baspasóz qyzmetine resmı suraý joldanyp, syrtqy saıası vedomstvo jaýap berdi. Onda respýblıkanyń reseı-ýkraın janjalyn beıbit, saıası-dıplomatıalyq jolmen retteýdi dáıekti túrde qoldaıtyny jáne taraptar tıisti tilek bildirse, qajetti jaǵdaılar men kelissózder alańyn usynýǵa daıyn ekendigi buǵan deıin de birneshe ret málimdelgeni atap ótildi.
Vedomstvo mundaı suraý túsken jaǵdaıda onyń jedel ári barlyq qajetti uıymdastyrý-tehnıkalyq talaptardy eskere otyryp qaralatynyn qosty. Aıta keteıik, bıylǵy jyldyń basynda Qazaqstan Prezıdenti Qasym-Jomart Toqaev pakıstandyq The News International basylymyna bergen suhbatynda Qazaqstannyń Ýkraına boıynsha kelissózderge alań usynýǵa daıyn ekenin de málimdegen edi.
SİM-niń bul máseledegi ustanymy birneshe jyl boıy ózgerissiz qalyp otyr. Áli 2022 jyly qazaqstandyq vedomstvo eki tarap qajet dep sanasa, alań usynýǵa daıyn bolǵan.