Qazaqstannyń erler semserlesý quramasy (shpaga) komandalyq jarysta álem chempıonatynyń altyn medalin tuńǵysh ret jeńip aldy. Fınalda otandyq sportshylar Ýkraına komandasyn jeńdi, dep habarlaıdy infohub.kz.
El namysyn Kırıll Prohodov, Erlik Sertaı, Vadım Sharlaımov jáne Rýslan Qurbanov qorǵady. Komandamen eki jylǵa jýyq ýaqyttan beri shaqyrylǵan ýkraınalyq maman Aleksandr Gorbachýk jumys isteıdi. Ol jetistikke joǵary baǵa berdi: «Fınal óte aýyr boldy. Shamamen 20 komanda – báriniń deńgeıi birdeı, keıde jeńisti bir ǵana shanshý sheshedi. Kishkentaı qatelik – komanda jeńis múmkindiginen aıyrylady. Úlken shoǵyrlaný, jigitter shydady. Aýystyrýlar boldy, Rýslan Qurbanov ýaqytynda kirip, kómektesti. Jigitter búgin erlik jasap, shydady. Bul ońaı emes, mundaı jeńis aspannan túsken joq. Bul – úlken eńbek, jaqsy daıyndyq, nátıjeli jıyndar men sparrıng-seriktester. Álem chempıonatyn aıaqtap, tarıhı altyn medal jeńip aldyq».
Gorbachýk álemdik semserlesýde báseke joǵary ekenin jáne jeńistiń kórnekti nátıje ekenin atap ótti. «Byltyrǵy álem chempıonatynda úshinshi oryn aldyq. Osydan keıin túsinik paıda boldy: eger qola ala alsaq, altyn da qoldan keledi. Kez kelgen medal – úlken jetistik, al altyn eshteńemen salystyrýǵa kelmeıdi. Men Japonıa quramasymen 15 jyl jumys istedim, olardyń olımpıadalyq altyn medali boldy, biraq komandalyq jarysta álem chempıonatynyń altyny bolmady. Men úshin bul nátıje – ómirlik, tarıhqa ený. Qazaqstan tarıh jazyp jatyr», – dep basa aıtty bapker.
Ol sondaı-aq jas sportshylar týraly aıtty: «Bizde osy jigitterden bólek jas shpagashylar bar. Mysaly, Nıkıta Jýlınskı álem chempıonaty aldynda jaraqat aldy. Aleksandr Fedotov pen Kırıll Pavlov bar, olar da joǵary deńgeıde semserlesedi. Olar halyqaralyq týrnırlerde komandaǵa laıyq ekenin kórsetti. Qazir demalamyz, sodan keıin kelesi maýsymǵa daıyndyq bastalady. Jigitter básekelestik pen eńbek arqyly osy quramada bolýǵa laıyq ekenin dáleldeýi kerek».
Shpagadan álem chempıonatynyń altyn medali – Qazaqstan sportynyń barlyq komandalyq túrleriniń tarıhyndaǵy alǵashqy júlde.