Qazaqstanda Eýrazıalyq ekonomıkalyq odaq elderinen ákelingen avtokólikterdiń ıelerine ýaqytsha tirkeý merziminiń aıaqtalatyny eskertildi. Alǵashqy besjyldyq tirkeý merzimderi qazirdiń ózinde aıaqtala bastady, dep habarlaıdy infohub.kz saıty.
Almaty oblysy polısıa departamenti avtokólik ıelerine tirkeý merzimi men qujattardy aldyn ala tekserýdi usyndy. Eger ýaqytsha tirkeý merzimi aıaqtalyp qalsa, azamattardan máseleni keıinge qaldyrmaı, kólikti odan ári paıdalaný tártibin aldyn ala naqtylaý suralady.
Polıseıler avtokólikti paıdalaný Qazaqstan zańnamasynyń talaptaryna sáıkes bolýy kerektigin de eske saldy.
Ýaqytsha tirkeý baǵdarlamasy 2023 jyldyń shildesinde bastalǵan bolatyn. Ol Qazaqstanǵa 2022 jyldyń 1 qyrkúıegine deıin ákelingen, biraq burynǵy tirkelgen elinde esepten shyǵarylmaǵandyqtan nemese ózge de shekteýlerge baılanysty zańdastyrylmaǵan avtokólikterge qoldanyldy.
Mundaı ıelerge bes jyl merzimge ýaqytsha esepke qoıýǵa ruqsat berildi, osy ýaqyt ishinde olar kóliktiń quqyqtyq mártebesin retteı alady. Ýaqytsha tirkeý resimdelgen kezde kýálikke «ıelený quqyǵynsyz jáne QR sheginen shyǵý quqyǵynsyz» degen belgi qoıyldy. Sheteldik memlekettik nómirler men tirkeý qujattary «Azamattarǵa arnalǵan úkimet» memlekettik korporasıasyna saqtaýǵa tapsyryldy.
Bes jyldyq merzim aıaqtalǵan soń ýaqytsha tirkeý avtomatty túrde toqtatylady. Bul shara Qazaqstanda 2023 jyldyń 23 qańtary men 1 shildesi aralyǵynda ótken sheteldik avtokólikterdi zańdastyrý naýqanynyń jalǵasy boldy.
Buǵan deıin Túrkistan oblysynda tirkeýsiz avtokólikter anyqtalyp jatqany habarlanǵan bolatyn.