Qazaqstannyń Oqý-aǵartý mınıstrligi mektep oqýshylarynyń smartfon qoldaný erejelerin bekitetin buıryq qabyldady: uıaly baılanys qurylǵysyn tek pedagogtiń ruqsatymen ǵana paıdalanýǵa bolady, dep habarlaıdy infohub.kz saıty.
Qazaqstan Respýblıkasynyń normatıvtik quqyqtyq aktileriniń etalondyq baqylaý bankisiniń saıtynda orta bilim berý uıymdarynda telefon qoldanýdyń barlyq erejeleri jazylǵan oqý-aǵartý mınıstriniń buıryǵy jarıalandy.
Qujatqa sáıkes, oqý sabaǵy kezinde uıaly baılanys qurylǵysy paıdalanylmaıdy, alaıda birqatar erekshelikter qarastyrylǵan. Atap aıtqanda, telefondy oqý maqsatynda pedagogtiń nusqaýymen, oqý tapsyrmasyn oryndaý úshin qajet bolǵanda; bilim alýshynyń, tárbıelenýshiniń nemese ózge adamdardyń ómirine jáne (nemese) densaýlyǵyna qaýip tóndiretin jaǵdaılar týyndaǵanda; bilim alýshynyń nemese tárbıelenýshiniń densaýlyq jaǵdaıyna baılanysty uıaly baılanys qurylǵysyn paıdalaný qajet bolǵanda qoldanýǵa jol beriledi.
Buıryqta oqý sabaǵy bastalǵanǵa deıin bilim alýshy telefondy dybyssyz rejımge qoıyp, dirildeý men dybystyq sıgnaldardy óshiretini ne ony óshiretini jazylǵan. Sonymen qatar mektepter uıaly baılanys qurylǵylaryn ornalastyrý úshin arnaıy jabdyqtalǵan oryndardy aıqyndaı alady.
Eger sabaq kezinde telefon qajet bolsa, buıryqta uıaly baılanys qurylǵysyn oqý maqsatynda paıdalanǵanda pedagog uıaly baılanys qurylǵysyn paıdalanýdy qajet etetin oqý tapsyrmasyn aıqyndaıtyny kórsetilgen. Uıaly baılanys qurylǵysyn paıdalaný bastalǵanǵa deıin pedagog bilim alýshylar men tárbıelenýshilerge oqý tapsyrmasynyń mazmunyn, uıaly baılanys qurylǵysyn paıdalaný tártibi men uzaqtyǵyn túsindiredi. Ol sondaı-aq oqý tapsyrmasyn óz betinshe oryndaýǵa qoıylatyn talaptardy jáne ony oryndaý kezinde uıaly baılanys qurylǵysyn paıdalanýdyń jol beriletin tásilderin túsindirip, uıaly baılanys qurylǵysyn paıdalanýdy bastaý jáne toqtatý týraly nusqaý beredi.
Bul rette oqýshy smartfondy tek pedagog aıqyndaǵan oqý tapsyrmasyn oryndaý úshin ǵana paıdalanýy tıis. Telefonnyń foto-, aýdıo- jáne beınejazba fýnksıalaryn paıdalaný da tek pedagogtiń nusqaýymen ǵana júzege asyrylady.
Mınıstrdiń buıryǵy 9 qazanda kúshine enedi. Buǵan deıin pedagog mártebesi men bilim týraly zańdarǵa engizilgen túzetýler aıasynda Qazaqstan mektepterinde uıaly telefondardy paıdalaný máselesi qarastyrylǵany habarlanǵan. Oqý-aǵartý mınıstri Juldyz Súleımenova Qazaqstan mektepterinde smartfondarǵa tyıym salý josparlary týraly tolyq aıtyp bergen edi.