2030 jyldan bastap Qazaqstanda azamattardyń óz turǵyn úıin jyl saıyn saqtandyrýy mindetteledi. Jańashyldyq páter men úı ıelerine qatysty bolady, al ony alǵashqy bolyp Almaty, Shymkent jáne Jambyl oblysynyń turǵyndary sezinedi, dep habarlaıdy infohub.kz saıty.

Sóz jer silkinisi, sý tasqyny, sel jáne orman órtterinen turǵyn úıdi mindetti saqtandyrýdy engizý týraly bolyp otyr. Qorǵanys alý úshin menshik ıeleri Turǵyn úıdi mindetti saqtandyrý qorymen shart jasasýǵa májbúr bolady.

Saqtandyrý quny 0,5-ten 5 aılyq eseptik kórsetkishke (AEK) deıin ózgerýi múmkin. Tólem mólsheri tabıǵat apatynan kelgen zalalǵa tikeleı baılanysty: turǵyn úı zaqymdansa — saqtandyrý syılyqaqysy somasynyń 250 eselengen mólsherinde, al joıylsa — 500 eselengen mólsherinde tólenedi.

«Krysha» portalynyń málimetinshe, turǵyn úıdi mindetti saqtandyrý 2030 jyldan bastap, aldymen Almaty, Shymkent jáne Jambyl oblysynda iske qosylady. Keıin júıeni taǵy 13 óńirge taratý josparlanyp otyr, jalpy alǵanda ol Qazaqstannyń 16 qalasy men oblysyn qamtıdy.

Turǵyn úıdi mindetti saqtandyrý polısi elektrondy bolady jáne bir jylǵa rásimdeledi. Tólemderdi qabyldaý men qor atynan sharttardy rásimdeýdi lısenzıasy bar saqtandyrý kompanıalary júzege asyra alady. Bul jumys úshin olardyń syıaqysy saqtandyrý syılyqaqysynyń 10%-yna deıin bolýy múmkin.

Polıs eki jaǵdaıda rásimdelýi kerek: menshik ıesi aýysqanda — menshik quqyǵy tirkelgennen keıin 10 jumys kúni ishinde; eger turǵyn úı zań talaptaryna saı bolsa, biraq menshik ıesi aýyspasa — 60 kúntizbelik kún ishinde.

Alaıda osy óńirlerde tótenshe jaǵdaı (TJ) jarıalansa, turǵyn úıge jańa polıs rásimdeý múmkin bolmaıdy. Shekteýler TJ joıylǵansha saqtalady.

Osylaısha, eger jańa «Saqtandyrý týraly» zań qabyldansa, páter men úı ıeleri mindetti saqtandyrý úshin jyl saıyn tóleýge májbúr bolady. Alaıda polıs tek úsh tabıǵat apatynan qorǵaıdy: sý tasqyny, jer silkinisi jáne tabıǵı órtter. Keńirek qorǵanys úshin erikti saqtandyrýdy rásimdeý qajet.

Aıta keteıik, zań jobasy qazir qoǵamdyq talqylaý satysynda, ol 2026 jyldyń 7 qazanyna deıin jalǵasady.

Eske salaıyq, búginde iri tabıǵat apattarynan keıin turǵyn úıdi qalpyna keltirý negizinen búdjet nemese azamattardyń óz qarajaty esebinen júzege asyrylady.

Sondaı-aq saqtandyrý salasynda basqa da ózgerister josparlanyp otyr, olar týraly bizdiń materıaldan bile alasyzdar.