Qazaqstandyq jáne tájikstandyq dárigerler tájirıbe almasyp, birlesken ota jasap, sheberlik sabaqtaryn ótkizedi. Bul — Qazaqstan medısınasy kúnderi aıasynda júzege asyp jatyr, dep habarlaıdy infohub.kz saıty.
Tájikstanǵa respýblıkalyq ǵylymı ortalyqtardyń kardıologıa, onkologıa, akýsherlik-gınekologıa, pedıatrıa jáne travmatologıa salasyndaǵy mamandary, sondaı-aq medısınalyq joǵary oqý oryndarynyń ókilderi jolǵa shyqty. Delegasıany densaýlyq saqtaý vıse-mınıstri Manas Ramazanov bastap bardy.
Qatysýshylar kardıologıa, kardıohırýrgıa, endokrınologıa, travmatologıa, akýsherlik-gınekologıa, pedıatrıa jáne basqa da baǵyttar boıynsha jumys isteıtin bolady. Olar pasıentterge keńes berip, ota jasap, sheberlik sabaqtaryn ótkizip, kúrdeli klınıkalyq jaǵdaılardy talqylaıdy.
Dýshanbede qazaqstandyq mamandar Tájik akýsherlik, gınekologıa jáne perınatologıa ǵylymı-zertteý ınstıtýtyna bardy. Onda olar bólimshelerdiń jumysymen tanysty.
Tájik dárigerleri úshin qazaqstandyqtar akýsherlik qan ketýlerdi emdeýdiń zamanaýı tásilderi boıynsha arnaıy prezentasıalar daıyndady.
Taǵy bir semınar qalqansha beziniń qatersiz túıinderin emdeýge arnaldy. Dárigerler radıochastottyq ablásıa ádisin talqylady. Bul — túıindi radıochastottyq energıamen joıýǵa múmkindik beretin az ınvazıvti ádis.
Qazaqstandyq dáriger Arman Ibraev tájik áriptesterimen birge qalqansha bezi aýrýlary bar pasıentterge keńes berip, klınıkalyq jaǵdaılardy taldady.
Jaqyn arada mamandar LOR-hırýrgıa, balalar men eresekter travmatologıasy, neonataldy hırýrgıa, balalar aýrýlaryn emdeý jáne onkoýrologıa boıynsha sheberlik sabaqtaryn ótkizedi.
Sapar qorytyndysy boıynsha taraptar birlesken medısınalyq forým ótkizip, Qazaqstan men Tájikstannyń medısınalyq uıymdary arasynda memorandýmdarǵa qol qoıýdy josparlap otyr.