Soltústik Qazaqstan oblysynda polıseıler jalǵan nómirli kólikpen qashyp qutylmaq bolǵan júrgizýshini ustady, dep habarlaıdy infohub.kz saıty.
Oblystyq polısıa departamentiniń málimetinshe, 12 tamyzda Mamlútka aýdan ortalyǵyna qaraı bet alǵan júrgizýshiler polısıanyń qýǵyn kórinisine kýá boldy: eki qyzmettik kólik aq tústi «Nıvany» qýyp bara jatty. Bul oqıǵanyń vıdeosy áleýmettik jelilerde paıda boldy.
«Polıseıler 42 jastaǵy júrgizýshini Voskresenovka aýylynyń mańynda ustady. Onyń aıtýynsha, ol "qorqyp ketkendikten" qashyp qutylmaq bolǵan. Polıseılerdiń toqtaý týraly talabyna mundaı dúrbeleń reaksıa oǵan 3 táýlikke deıin ákimshilik qamaqqa alynýy múmkin», — deıdi SQO DP-da.
Tártip saqshylarynyń kólikke nazar aýdarýyna sebep — avtokóliktiń syrtqy túri men memlekettik nómiriniń sáıkes kelmeýi. Er adam kólikti jóndeý kezinde ózi kýzovty aýystyrǵanyn túsindirdi.
Polıseılerdiń aıtýynsha, mundaı aýystyrýdan keıin arnaıy HQKO-ǵa habarlasyp, qaıta tirkeý máselesin sheshý jetkilikti edi. Endi aýyl turǵyny polısıa qyzmetkerleriniń zańdy talabyna baǵynbaǵany úshin ǵana emes, jalǵan memlekettik nómirdi paıdalanǵany úshin de ákimshilik jaýapkershilikke tartylady — 5 táýlikke deıin qamaqqa alynyp, 1 jylǵa kólik júrgizý quqyǵynan aıyrylýy múmkin.