Qazaqstandaǵy sıfrlyq aktıv ıeleri artyq aýdarymdarsyz, arnaıy krıptokartalar arqyly tólem jasaý múmkindigine qol jetkizdi. Mundaı ónimdi eki bank ázirledi, dep habarlaıdy infohub.kz saıty.
Krıptovalútalar — kópshilik qabyldaıtyndaı tek joǵary táýekeldi sıfrlyq aktıv qana emes, sonymen qatar qarjylyq ınfraqurylymdy jetildirip, jedeldetýdiń orasan zor áleýeti. Sondyqtan ártúrli elder krıptotehnologıalardy dástúrli aqsha esep aıyrysý salasymen biriktirýge umtylýda.
Qazaqstanda bul múmkindik krıptovalúta kartalary túrinde iske qosyldy. Bul týraly Astana Finance Days 2026 forýmy aıasyndaǵy «Qarjylyq ınfraqurylymnyń bolashaǵy» paneldik dıskýssıasynda sóılegen Mastercard-tyń Qazaqstandaǵy bas dırektory Sanjar Jamalov aıtty.
Spıkerdiń aıtýynsha, Mastercard «Bank SentrKredıt» jáne «Eýrazıalyq bank»-pen seriktestikte krıptokartalardy ázirlegen — bul krıptovalútany taýarlar men qyzmetterge jumsaýǵa múmkindik beretin qural.
Ol bul sıfrlyq aktıvterdi paıdalaný tájirıbesin aıtarlyqtaı jeńildetetinin atap ótti: ádette qazaqstandyqtar birneshe quralmen birden jumys isteý qajettiliginen qorqady — krıptobırjada aktıvterdi satý kerek, bul belgili bir bilim men daǵdyny talap etedi. Munda aqshany durys emes jerge jiberý qorqynyshy týyndaıdy, kúrdeli júıelerdi túsinýge týra keledi. Al krıptokartamen tóleý prosesi qarapaıym bank kartasynan esh aıyrmashylyǵy joq.
«Aıtalyq, sizde krıptobırjada aqsha bar, ári sizge tanys banktiń krıptokartasy bar. Eshteńe aýdarýdyń qajeti joq — kartany alyp, kez kelgen satýshyǵa baryp, kartamen tóleısiz. Iaǵnı, úzdiksiz tranzaksıa jasalady», — dedi Sanjar Jamalov.
Bul rette esep aıyrysý krıptovalúta arqyly emes, teńgemen júzege asady: krıptokartamen tólegende «Astana» halyqaralyq qarjy ortalyǵynyń alańynda krıptobırja men ekinshi deńgeıli bank arasynda sıfrlyq aktıv ulttyq valútada aǵymdaǵy baǵam boıynsha konvertasıalanady; satýshy tólemdi teńgemen lezde alady.
«Bul — retteletin standartty tranzaksıa. Jáne bul júıeler arasyndaǵy ınteroperabeldilikti qurý úshin mańyzdy qadam, osynyń bári úzdiksiz, qaýipsiz jáne barlyǵyna qolaıly bolýy úshin», — dep qorytyndylady Sanjar Jamalov.
Sondaı-aq Mastercard basshysy Crypto Credential júıesin qurý týraly aıtty — ol krıptoámıandardyń uzyn jáne kúrdeli mekenjaılaryn qarapaıym jáne túsinikti búrkenshik attarmen (alıastarmen) nemese paıdalanýshy esimderimen qysqartý arqyly paıdalanýshylar arasynda krıptovalúta aýdarýdy aıtarlyqtaı jeńildetedi.
Basqasha aıtqanda, krıptovalúta tehnologıalary dástúrli qarjy júıesine belsendi engizilip, kóptegen prosesterdi jeńildetip, paıdalanýshylarǵa kóbirek múmkindikter usynýda.