Qazaqstandyq krıptovalúta qoldanýshylarynyń úshten biri derlik sıfrlyq aktıvtermen taýar men qyzmet úshin tólem jasaıdy. Al 90%-dan astamy jaqyn 3–5 jylda krıptovalútanyń elde keń taralýyn kútedi. Bul derekterdi Binance Kazakhstan óziniń 2 000-ǵa jýyq qoldanýshysy arasynda júrgizgen saýalnama qorytyndysy boıynsha keltirip otyr, dep habarlaıdy infohub.kz saıty.
Krıptovalúta dástúrli túrde spekýlátıvti aktıv retinde qabyldanady — ony tek qaıta satý men tabys tabý úshin alady dep esepteledi. Alaıda saýalnama nátıjeleri sıfrlyq aktıvterge qyzyǵýshylyqtyń tez ósip kele jatqanyn kórsetedi. Respondentterdiń úshten birge jýyǵy ony satyp alýǵa tólem jasaý úshin qoldanady.
Krıptovalútany qazirgi nemese bolashaqta qoldaný maqsattary arasynda 60,2% ınvestısıany, 58,5% qosymsha tabys tabýdy, 48,8% uzaq merzimdi jınaqtaýdy, 42,6% treıdıngti ataǵan. Praktıkalyq senarıler de aıtarlyqtaı oryn alady: 32,8% taýar men qyzmetke tólemdi, 25,1% halyqaralyq aýdarymdardy tańdaǵan.
Qazaqstandyqtar sıfrlyq aktıvterdi praktıkalyq qoldanýda aıtarlyqtaı ózgerister kútedi. Máselen, respondentterdiń 64,6%-y jaqyn 3–5 jylda eń jyldam krıptólemder damıdy dep sanaıdy — bul usynylǵan baǵyttar arasyndaǵy eń joǵary kórsetkish.
Ekinshi orynda halyqaralyq aýdarymdar — 42,6%, ınvestısıany da shamamen sonsha qatysýshy tańdaǵan — 42,1%. Taǵy 35% krıptokartalardyń, al 27,8% steıblkoınderdiń belsendi damýyn kútedi.
«Bul kútýler naryqtyń ózin qabyldaýdyń ózgerýimen ushtasady: respondentterdiń 40,3%-y krıptonaryq birtindep praktıkalyq sıpat alyp keledi dep eseptese, taǵy 25,1%-y ol qazirdiń ózinde qarjy júıesiniń bóligine aınaldy dep sanaıdy», — deıdi Binance Kazakhstan ókilderi.
Saýalnamaǵa qatysýshylar Qazaqstandaǵy sıfrlyq aktıvterdiń bolashaǵyn oń baǵalaıdy. Bırja derekterine sáıkes, 91,2% jaqyn 3–5 jylda elde krıptovalúta qoldaný keń taralady dep esepteıdi: 46,4% «ıá, sirá» dep jaýap berse, taǵy 44,8% aıtarlyqtaı ósim kútedi.
Qatysýshylardyń jartysyna jýyǵy — 47,9% — bes jyldan keıin krıptovalútalar kúndelikti qarjynyń bir bóligine aınalady dep sanaıdy, al 20,3% olar negizinen ınvestısıa úshin qoldanylady dep kútedi.
«Saýalnama nátıjeleri qoldanýshylardyń sıfrlyq aktıvterge qyzyǵýshylyǵy alýan túrli bola túskenin kórsetedi. Investısıa mańyzdy rólin saqtaı otyryp, sonymen qatar tólemder, aýdarymdar jáne basqa da qarjy operasıalary sıaqty praktıkalyq senarılerge qyzyǵýshylyq artyp keledi. Ásirese, qatysýshylardyń krıptólemderdi jaqyn jyldarda eń jyldam damıtyn baǵyt dep jıi ataýy erekshe kórsetkish. Naryqtyń odan ári damýy úshin qoljetimdilik, qaýipsizdik jáne paıdalanýshylardy oqytý baǵytynda jumysty jalǵastyrý mańyzdy», — dedi Binance Kazakhstan bas menedjeri Nurhat Kúshimov.