Qazaqstandyqtar bank depozıtterinde 30,5 trln teńgeden astam qarajat jınady

2026 jylǵy tamyz aıynyń qorytyndysy boıynsha qazaqstandyqtar otandyq bankterdegi depozıtter men shottarda 30,5 trln teńgeden astam qarajat jınaqtady. Bul somanyń 80%-dan astamy teńgemen saqtalyp otyr. Jýrnalıserdiń atap ótýinshe, depozıtter jınaq qalyptastyrýdyń eń tanymal quraldarynyń biri bolyp qala beredi, óıtkeni ekinshi deńgeıdegi otandyq bankter usynyp otyrǵan paıyzdar eldegi ınflásıadan aıtarlyqtaı joǵary, dep habarlaıdy infohub.kz saıty.

Qazaqstan Respýblıkasy Ulttyq bankiniń derekterine sáıkes, tamyzda ashylǵan jeke tulǵalar depozıtteri boıynsha naryqtaǵy ortasha syıaqy mólsherlemesi 15,7% boldy. Salystyrar bolsaq, jalpy ınflásıa 9,8% deńgeıinde tur. Sonymen qatar mólsherlemeler úsh aı qatarynan tómendep keledi: shildede olar 15,9%, maýsymda — 16,2%, al mamyrda naryq boıynsha orta eseppen 16,8% bolǵan. Degenmen keıbir depozıttik ónimder áli de 20% shamasyndaǵy mólsherlememen jumys istep tur.

Bank salymdary qazaqstandyqtar úshin tıimdiligi azaıyp kele jatsa da, olardyń jalpy kólemi ósýin jalǵastyryp otyr. Ulttyq banktiń derekteri boıynsha, tamyzda jeke tulǵalardyń bank depozıtterinde shamamen 30,5 trln teńge jınaqtalǵan. Bir aıda soma 0,49%-ǵa, al bir jylda birden 17,33%-ǵa ósti. Aıta keterligi, ósim negizinen teńgelik salymdar esebinen bolyp otyr: olar bir jylda 22,69%-ǵa artyp, 24,7 trln teńgege jetti, al shetel valútasyndaǵy depozıtter 0,94%-ǵa azaıyp, 5,9 trln teńge boldy. Qarapaıym tilmen aıtqanda, qazir azamattardyń barlyq jınaǵynyń 80%-dan astamy teńgelik salymdarǵa tıesili.

Barlyq jınaqtyń basym bóligi merzimdi jáne merzimsiz depozıtterde saqtalyp otyr — shamamen 24,4 trln teńge. Taǵy 3,6 trln teńgege jýyq qarajat azamattardyń aǵymdaǵy shottary men talap etilgenge deıingi salymdarynda jatyr. Tamyzda jınaq depozıtterinde 2,6 trln teńgege jýyq, al shartty salymdarda shamamen 7,7 mlrd teńge boldy.

Osylaısha, mólsherlemelerdiń tómendeýine qaramastan, depozıtterdiń kólemi ósýin jalǵastyryp otyr. Bolashaqta shetel valútasyndaǵy depozıtterdiń sharttary jaqsaryp, olar salymshylar úshin tartymdyraq bolýy múmkin.