Qazaqstanda halyqqa qyzmet kórsetý ortalyqtaryna júginý sany aıtarlyqtaı azaıdy: operatorlarǵa qatynaý 30%-ǵa qysqardy. Bul týraly úkimet otyrysynda premer-mınıstrdiń orynbasary – jasandy ıntellekt jáne sıfrlyq damý mınıstri Jaslan Madıev málimdedi, dep habarlaıdy infohub.kz.
Madıevtiń aıtýynsha, eń suranysqa ıe qyzmetterdiń onlaın-formatqa aýysýy azamattardyń HQKO-ǵa jeke barý qajettiligin edáýir tómendetti. Atap aıtqanda, qazir elektrondy túrde kólik quraldaryn alǵashqy tirkeý, jer ýchaskelerine aktiler berý jáne jyljymaıtyn múlikke kadastrlyq pasporttar alý qoljetimdi.
«ESQ berý, turǵylyqty jeri boıynsha tirkelý búkil el boıynsha tolyǵymen derlik onlaın júzege asyrylady. Adam HQKO-ǵa kelse de, oǵan operatordyń kómegi jıi qajet emes. Ol qyzmetti ózine-ózi qyzmet kórsetý aımaǵynda derbes alady», — dep atap ótti mınıstr.
Ol sondaı-aq HQKO tujyrymdamasy qaıta qaralǵanyn habarlady. «Jańa AI halyqqa qyzmet kórsetý ofısi 70/20/10 qaǵıdaty boıynsha úsh aımaqtan turady. Jalpy aýdannyń 70%-yn alatyn negizgi ekspress-aımaqta qyzmetterdi eGov GPT sıfrlyq kómekshisi bar termınaldar arqyly óz betinshe alýǵa bolady. Sondaı-aq keńsede kelýshige keńesshi qoljetimdi saraptamalyq jáne oqytý aımaqtary bar», — dedi Madıev.
Alǵashqy mundaı ofıs maýsym aıynda Jezqazǵanda ashyldy, keıin Túrkistan, Astana jáne Sátbaev qalalarynda paıda boldy. Mınıstrdiń aıtýynsha, sıfrlyq keńseler qazirdiń ózinde 4 myńnan astam adamǵa qyzmet kórsetken.