Almatydaǵy Farabi Hub alańynda stýdentter arasyndaǵy shahmattan komandalyq álem chempıonaty — FIDE World University Team Chess Championship-2026-nyń birinshi oıyn kúni aıaqtaldy. Eki týrdyń qorytyndysy boıynsha D tobyndaǵy tórttikti qazaqstandyq komandalar — QazUÝ jáne QSÝ bastap tur, dep habarlaıdy infohub.kz saıty.
Reglamentke sáıkes, álemniń on elinen kelgen 16 qurama jerebe qorytyndysy boıynsha tórt topqa bólinip, bir-birimen eki machtan dóńgelek júıede ótkizedi.
Qazaq ulttyq ýnıversıtetiniń (QazUÝ) quramasy týrnırde senimdi start aldy. Birinshi týrda Oksford stýdentterin 3:1 esebimen utsa, ekinshi týrda da sol qarsylasyn 3,5:0,5 esebimen jeńip, óz basymdyǵyn rastady. Bul machtarda FIDE sheberi Erlan Tleýhanov, sondaı-aq Bekarys Tursynalı men Sultan Amanjol jeńiske jetti. Eki komandalyq upaı jınaǵan týrnır ıeleri D tobyn bastap tur.
1,5 upaımen ekinshi orynda Sport ýnıversıtetiniń (QSÝ) komandasy tur. Olar ekinshi týrda ındonezıalyq stýdenttermen 2:2 esebimen teń oınady. Bul týrda astanalyqtarǵa jalǵyz jeńisti halyqaralyq sheber Merýert Kamalıdenova ákeldi.
Eki týrdan keıin eki komandalyq upaıdan Reseıdiń Oral memlekettik taý-ken ýnıversıtetiniń (OMTKÝ), sondaı-aq amerıkalyq Sent-Lýıs, Dallas jáne grek Afına komandalarynyń aktıvinde bar.
Erteń 3-shi jáne 4-shi týrlardyń partıalary ótedi. Dóńgelek júıedegi machtar ár tórttikten eki úzdik komandany anyqtaıdy. Odan ári pleı-off: shırek fınal, jartylaı fınal, úshinshi oryn úshin mach jáne fınal ótedi.
Oıyndar tórt taqtada ótedi. Ár komanda quramynda keminde bir er jáne keminde bir áıel bolýy tıis. Ýaqyt baqylaýy — birinshi júristen bastap ár júriske 45 mınýt plús 30 sekýnd.
Týrnırdi FIDE Qazaqstan Respýblıkasy Týrızm jáne sport mınıstrligimen, Qazaqstan Respýblıkasy Ǵylym jáne joǵary bilim mınıstrligimen, Qazaqstan shahmat federasıasymen jáne Almaty qalasy ákimdigimen birlesip uıymdastyryp otyr. Bas seriktester — Freedom kompanıalar toby jáne «Shapaǵat» korporatıvtik qory.
Jalpy júlde qory 50 myń eýrony quraıdy. Chempıondar 25 myń eýro, vıse-chempıondar 15 myń eýro, al úshinshi oryn alǵan komanda 10 myń eýrony bólisedi.