«QazAvtoJol» ulttyq kompanıasy merdiger jáne qosalqy merdiger uıymdarǵa alaıaqtar týraly eskertý jasady. Olar ózderin deldal retinde tanystyryp, syıaqy úshin jol jobalary men jumys kólemderin alýǵa járdemdesetinin aıtady, dep habarlaıdy infohub.kz saıty.
Belgisiz adamdar kompanıa ókilderine habarlasyp, ulttyq kompanıa ishinde baılanystary bar ekenin málimdeıdi. Olar aqsha úshin jumystardy bólýge nemese satyp alý rásimderiniń nátıjelerine áser etýge ýáde beredi.
«Kompanıa basshylyǵy men qyzmetkerleri úshinshi tulǵalarǵa kelissózder júrgizýge, jobalar alýǵa ýáde berýge, jetkizýshilerdiń múddesin lobbıleýge nemese tender nátıjelerine áser etýge ókilettik bermegen», — dep málimdedi «QazAvtoJolda».
Bir jaǵdaıda bógde adamdar kompanıanyń bas keńsesine kelip, «jobalar boıynsha máselelerdi sheshýdi» usynǵan. Qaýipsizdik qyzmeti bul faktini anyqtap, materıaldardy quqyq qorǵaý organdaryna tapsyrǵan.
«Bul adamdardyń «QazAvtoJol» UK» AQ qyzmetine esh qatysy joq. Barlyq satyp alý rásimderi Qazaqstan Respýblıkasynyń zańnamasyna sáıkes qana júzege asyrylady», — delingen ulttyq kompanıa habarlamasynda.
Konkýrstar, qatysý sharttary, ótinim berý merzimderi jáne satyp alý nátıjeleri týraly aqparat Qazaqstannyń memlekettik satyp alý resmı veb-portalynda ornalastyrylady.
Kompanıa mundaı usynystarda alaıaqtyq, zańsyz deldaldyq jáne naryq qatysýshylaryn sybaılas jemqorlyq sqemalaryna tartý áreketteriniń belgileri bolýy múmkin ekenin atap ótti.
«Kompanıa merdiger jáne qosalqy merdiger uıymdardy saq bolýǵa, kúmándi tulǵalarǵa aqsha aýdarmaýǵa, beıresmı kelissózderge túspeýge jáne satyp alý týraly barlyq aqparatty tek resmı kózder arqyly tekserýge shaqyrady», — delingen habarlamada.
Kúdikti usynystar týraly «QazAvtoJoldyń» sybaılas jemqorlyqqa qarsy komplaens qyzmetine +7 (7172) 64-87-35 senim telefony, 1403 koll-ortalyǵy nemese hotline@qaj.kz elektrondyq poshtasy arqyly habarlaýǵa bolady.