Qazaqstandyq grek-rım kúresiniń balýany Qazybek Qalmaǵambetov Slovakıada ótip jatqan jastar (U20) arasyndaǵy álem chempıonatynda 67 kelige deıingi salmaqta bas júldege talasatyn boldy, dep habarlaıdy infohub.kz.
Búgin keshke qazaqstandyq balýan altyn úshin belarýstik Mıhaıl Markovskımen kúsh synasady. Qalmaǵambetov fınalǵa deıingi jolyn nemis Sebastán Vagnerden basym túsýmen bastady – 9:0. Sodan keıin amerıkandyq Emrın Braıan Natterdi tóreshilerdiń sheshimimen jeńdi – 1:1. Shırek fınalda Qazybek mysyrlyq Mohamed Hasan Ahmed Mohamad Abdelrehımnen basym tústi – 4:1. Al jartylaı fınalda Vengrıa týy astynda óner kórsetken Petro Jıtovozdy 7:5 esebimen utty.
Qalmaǵambetovtiń komandalasy Marlan Baqaev (72 kelige deıin) keshke jubanysh beldesýleri arqyly qola júldege talasady. Bizdiń grek-rım balýandary Erasyl Musan (55 keli) men Maksım Ýkraınsev (97 keli) medalǵa iline almady.
Keshe Erkebulan Anapıa (77 keli) qola úshin beldesýde ırandyq Ámir Mahdı Mohammad Saedı Naveden 3:5 esebimen utylyp qaldy.
Slovakıa astanasynda bastalǵan Halyqaralyq kúres federasıasynyń (UWW) qamqorlyǵymen ótip jatqan álem birinshiligine álemniń túkpir-túkpirinen 700-ge jýyq jas sportshy qatysýda. Olar kúrestiń úsh túrinen – grek-rım, erkin jáne áıelder kúresinen 120 medaldy sarapqa salady.
Qazaqstan Bratıslavada 30 sportshymen ókildik etedi – 20 jigit jáne 10 qyz.
Týrnır 23 tamyzda aıaqtalady.