«Chelsı» bas bapkeri Habı Alonso Dastan Satpaevtyń londondyq komanda sapyndaǵy debúttik golynan keıin onyń oıynyn joǵary baǵalady. Ol 17 jastaǵy fýtbolshynyń jyldamdyǵy, fızıkalyq qasıetteri men qozǵalý mánerin erekshe atap ótti. «Men Dastanmen byltyrǵy jyldan beri tanyspyn, ol Almatyda «Qaırat» sapynda oınady. Birden kórýge bolady, bul erekshe oıynshy», — dep Alonsonyń sózin football.london keltirdi, dep habarlaıdy infohub.kz.
Satpaev ıspandyq bapkerdiń basshylyǵymen ótken «Chelsı» maýsym aldyndaǵy birinshi machta gol soqty. Qazaqstandyq oıynshy sol qaptalda negizgi quramda shyǵyp, jetinshi mınýtta «Vestern Sıdneı Ýonderers» komandasyna qarsy oıynda esep ashty. Londondyqtar 6:4 esebimen jeńiske jetti.
Alonsonyń aıtýynsha, qazaqstandyq fýtbolshy qaptalda oınaǵanda da, ortalyq aımaqqa aýysqanda da qarsylas qaqpasyna qaýip tóndire alady. «Ol qarsylas qaqpasyna únemi qaýip tóndiredi, syzyqtar arasyndaǵy keńistikti óte jaqsy shabýyldaıdy, shabýylshynyń qasynda áreket etedi, qaptaldan oryn aýystyrýdy durys júzege asyrady», — dep atap ótti bapker.
«Chelsı» bapkeri Satpaevtyń Qazaqstannan kóship kelgennen keıingi beıimdelýin de oń baǵalady. «Ol úshin bul Qazaqstannan kóship kelgennen keıingi alǵashqy tájirıbe jáne bizdiń klýbtaǵy alǵashqy qadamdar, ázirge ol óte jaqsy áser qaldyryp otyr».
Satpaevtyń Anglıa Premer-lıgasynyń qarqyny men fızıkalyq talaptaryna daıyndyǵy týraly suraqqa Alonso qazaqstandyq oıynshynyń erekshelikterin atap ótti. «Ol fızıkalyq turǵydan óte myqty ári óte jyldam. Meniń oıymsha, ol sizderdi shynymen tań qaldyrady», — dep qosty Alonso.
Satpaevtyń 2026/27 maýsymyndaǵy bolashaǵy týraly túpkilikti sheshim ázirge jarıalanbady. Maýsym aldyndaǵy daıyndyq qorytyndysy boıynsha bapkerler shtaby qazaqstandyq oıynshynyń negizgi komandada qalatynyn nemese jalǵa beriletinin anyqtaıdy. «Chelsı» shabýyl shebindegi báseke joǵary bolyp qalady: Alonsonyń qaramaǵynda Joaý Pedro, Lıam Delap, Djeımı Gıttens, Koýl Palmer, Estevao jáne Pedrý Netý, sondaı-aq jańa oıynshylar Djovannı Kenda men Emmanýel Emega bar.
Sonymen qatar, Sky Sport Germany jýrnalısi Florıan Plettenberg «Chelsı» «Braıtonmen» Dennı Ýelbektiń transferi boıynsha tolyq kelisimge kelgenin habarlady. 35 jastaǵy shabýylshy «arıstokrattarmen» 2028 jylǵa deıin kelisimshartqa otyrady dep kútilýde.