Hormýz ben Bab ál-Mandeb buǵazdary arqyly keme júrisiniń toqtaýy teńiz saqtandyrý baǵasyn kúrt qymbattatty. Álemdik ekonomıka úshin mańyzdy eki sý joly qazir soǵys alańyna aınaldy, dep habarlaıdy infohub.kz.
Iemendik hýsıler (Iran qoldaıtyn top) osy apta basynda Qyzyl teńiz ben Úndi muhıtyn jalǵaıtyn Bab ál-Mandeb buǵazynda Saýd Arabıasy porttary men kemelerine blokada jarıalady. Bul – AQSh pen Izraıldiń Iranǵa qarsy soǵysyna baılanysty Hormýz buǵazyndaǵy úzilisterdiń ústine kelgen jaǵdaı. Tegeran kemelerdiń buǵazdan ótý úshin ruqsat alýy kerektigin málimdese, AQSh Iranǵa qatysty kemelerge teńiz blokadasyn engizdi.
Hormýz buǵazyndaǵy jaǵdaıǵa kelsek, Iran Islam revolúsıasy kúzet korpýsy (IRKK) beısenbide bir tankerdiń jarylystan órtengenin habarlady. IRKK úsh kemeniń AQSh buıryǵymen áreket etkenin aıtyp, «Hormýz buǵazy bizdiń baqylaýymyzda, munaı tasıtyn kemelerdiń kirýine nemese shyǵýyna tyıym salyndy» dep eskertti. Soǵysqa deıin buǵazdan kúnine 120-140 keme ótetin bolsa, qazir bul kórsetkish ne bary eki tankerge deıin tómendegen. S&P Global málimetinshe, seısenbide buǵazdan 10 keme ótken (dúısenbide 16 bolǵan).
Saqtandyrý baǵasy da aıtarlyqtaı ósti. S&P Global esebinde buryn keme qunynyń 1-3 paıyzyn quraǵan soǵys táýekelin saqtandyrý endi 7,5-10 paıyzǵa jetken. Parsy shyǵanaǵynan Qytaıǵa munaı tasymaldaý quny bir metrıkalyq tonna úshin 77,96 dollar bolyp, bes jyldyq ortasha kórsetkishten tórt ese joǵary. Osy baǵamen 270 myń tonnalyq tankerdi saqtandyrý shamamen 21 mıllıon dollar turady.
Bab ál-Mandeb buǵazynda hýsıler Saýd Arabıasyna qarsy teńiz blokadasyn jarıalap, eki saýd arabıalyq munaı tankerine shabýyl jasady. Saýd Arabıasynyń SPA agenttigi Encelia tankeriniń zaqymdanǵanyn rastady. S&P esebi boıynsha, buǵazdaǵy keme qatynasy seısenbide 30 paıyzǵa azaıyp, 41 kemeden 29-ǵa túsken. Bab ál-Mandeb arqyly ótetin kemeler úshin saqtandyrý syılyqaqysy 0,5 paıyzdy qurasa, batys Saýd Arabıasy mańyndaǵy Qyzyl teńizde bul kórsetkish 0,1 paıyz.