Almatyda Qala kúnin merekeleý aıasynda «KitapFest» qalalyq kitap jármeńkesi ashyldy. Ol ádebıet pen oqyrmandy biriktirdi, dep habarlaıdy infohub.kz saıty.
Eki kúnge sozylatyn mádenı sharanyń alǵashqy kúni Arbat alańynda qala turǵyndary men qonaqtary ádebıet álemine enip, jazýshylarmen kezdesip, jańa kitaptarmen tanysý múmkindigine ıe boldy.
Bıylǵy jármeńkege 60-tan astam baspa qatysyp, oqyrmandarǵa ártúrli janrdaǵy jańa jáne tańdaýly basylymdaryn usyndy. Kelýshiler ózderine unaıtyn kitaptardy tańdap qana qoımaı, otandyq avtorlarmen júzdesip, olarmen áńgimelesip, shyǵarmashylyqtaryn talqylaı alady.
Jármeńkeniń birinshi kúni tanymal aqyn-jazýshylarmen ádebı kezdesýler ótýde. Kezdesýge qatysýshylar shyǵarmashylyq týraly oılarymen, oqý mádenıetiniń mańyzy men qazirgi oqyrmandardyń talǵamy týraly bólisip, qonaqtardyń suraqtaryna jaýap berýde.
Kezdesý barysynda jazýshy jáne dramatýrg Álisher Rahat almatylyqtardy Qala kúnimen quttyqtap, «KitapFest» oqyrmandar men jazýshylardy, sondaı-aq ádebıet qaýymdastyǵy men qala turǵyndaryn jyl saıyn biriktiretin mańyzdy mádenı alań ekenin atap ótti.
Jármeńkege kelgen almatylyqtar usynylǵan kitaptar men avtorlarmen kezdesýlerge úlken qyzyǵýshylyq tanytýda.
«Búgin men kitap jármeńkesine arnaıy keldim. Munda ártúrli janrdaǵy kitaptar kóp, ózime unaǵan birneshe kitapty taýyp qoıdym. Ásirese otandyq avtorlarmen kezdesip, olardyń shyǵarmalary týraly tikeleı ózderinen estý qyzyqty boldy», — dedi Almatylyq stýdent Asyljan Baýyrjanuly.
Almatyda oqýǵa degen qyzyǵýshylyqty arttyryp, oqyrmandar men ádebıet qaýymdastyǵy arasyndaǵy baılanysty nyǵaıtýǵa baǵyttalǵan jobalar turaqty túrde júzege asyrylyp keledi. «KitapFest» kitap jármeńkesi osyndaı mádenı bastamalardyń birine aınaldy. Mundaı sharalar oqý mádenıetin damytýǵa, otandyq ádebıetti nasıhattaýǵa jáne qalanyń mádenı ómirin baıytýǵa yqpal etedi.
Eske salaıyq, «KitapFest» qalalyq kitap jármeńkesi 19–20 qyrkúıekte saǵat 10:00-den 18:00-ge deıin Arbat alańynda ótedi. Almaty turǵyndary men qonaqtaryn jármeńkege kelip, onyń baǵdarlamasyna qatysýǵa shaqyramyz.