Qytaıdaǵy Tanshan Sanú kómir razrezinde natrı-ıondy batareıamen jumys isteıtin álemdegi alǵashqy elektrli karerlik samosval iske qosyldy, dep habarlaıdy infohub.kz.
Mashınany Hina Battery jáne Tonly Heavy Industry kompanıalary ázirledi. Onyń negizine Haixing serıasyndaǵy qýaty 676 kVt·saǵ natrı-ıondy akýmýlátory bar TLE120 samosvaly alynǵan. Ázirleýshilerdiń málimetinshe, ol óte jyldam zarádtaýdy qoldaıdy: qýatty 0-den 100%-ke deıin nebári 20–25 mınýtta toltyrýǵa bolady.
Tehnologıanyń taǵy bir artyqshylyǵy — uzaq merzimdilik. Tipti únemi jyldam zarádtaý kezinde akýmýlátor 8 myń sıklden astamǵa eseptelgen, bul samosvaldyń qyzmet etý merzimimen salystyrylady.
Natrı-ıondy batareıalardyń lıtı-ıondylardan basty aıyrmashylyǵy — aıazǵa tózimdiligi. Olar tómen temperatýrada syıymdylyǵyn az joǵaltady, sondyqtan soltústik aımaqtardaǵy ashyq karerlerde jumys isteýge qolaıly.
Sonymen qatar, elektrli samosval zıandy shyǵaryndylar shyǵarmaıdy jáne dızeldi tehnıkaǵa qaraǵanda aıtarlyqtaı tynysh jumys isteıdi. Endi ony jańa tehnologıanyń tıimdiligin baǵalaý úshin naqty jaǵdaılarda synaıtyn bolady.
Nege natrı ázirge lıtıdi almastyra almaıdy
Jobanyń sátti iske qosylǵanyna qaramastan, natrı-ıondy batareıalarǵa jappaı kóshý týraly aıtý áli erte. Olardyń energıa syıymdylyǵy qazirgi lıtı-temir-fosfatty (LFP) akýmýlátorlardan tómen. Salystyrý úshin, osy samosvaldyń byltyrǵy nusqasy 801 kVt·saǵ batareıamen jabdyqtalǵan, al jańasynda bul kórsetkish 676 kVt·saǵ.
Degenmen, arzan shıkizat, joǵary beriktik jáne aıazda turaqty jumys isteýiniń arqasynda mundaı akýmýlátorlar júris qory sheshýshi ról atqarmaıtyn komersıalyq jáne arnaıy tehnıkada qoldanys tabýy múmkin.
Buǵan deıin Kýrsıv Avto Qazaqstanda jergilikti óndiristiń kýzovymen jabdyqtalǵan jańa KamAZ samosvaly kórsetilgenin habarlaǵan bolatyn.