Aqtóbe oblysynda 16 óńir turǵyny zardap shekken iri ınternet-alaıaqtyq sqemasy anyqtaldy, dep habarlaıdy infohub.kz.
Aqtóbe oblysy boıynsha QMA Departamentiniń qyzmetkerleri ınternet-alaıaqtyqqa járdemdesý, zańsyz kásipkerlik, dropperlik jáne qylmystyq kiristerdi zańdastyrý faktileri boıynsha qylmystyq isti tergep jatyr.
"Tergeý derekteri boıynsha, Aqtóbe qalasynda telefon jáne ınternet-alaıaqtyǵy nátıjesinde azamattardan urlanǵan aqshany qabyldaý, aıyrbastaý jáne jylystatýdyń turaqty sqemasyn qurǵan qylmystyq top áreket etken. Top quramyna onnan astam adam kirgen. Qylmystyq sqemany júzege asyrý úshin uıymdastyrýshylar 150-den astam dropperdi tartqan", — delingen Qarjy monıtorıńi agenttiginiń resmı Telegram-arnasynda.
Top músheleri aldyn ala daıyndalǵan bank qosymshalary men krıptoámıandary bar uıaly telefondardy paıdalanǵan. Bul dropperlerdiń shottaryn qashyqtan basqarýǵa jáne olardyń qatysýynsyz qarjylyq operasıalardy júrgizýge múmkindik bergen. Blokcheın-analıtıka quraldarynyń kómegimen urlanǵan qarajatty zańdastyrýdyń tolyq sqemasy qalpyna keltirildi.
"Aldymen jábirlenýshilerdiń aqshasy tranzıttik bank shottary arqyly ótip, keıin baqylaýdaǵy dropperlerdiń shottaryna túsken. Odan soń olar krıptovalútalyq platformaǵa jiberilip, USDT sıfrlyq aktıvterin satyp alýǵa jumsalǵan. Operasıalarǵa zańdylyq sıpatyn berý úshin jalǵan nesıe kelisimsharttary men nomınaldy kompanıalar paıdalanylǵan. Sońǵy kezeńde qylmystyq kirister qolma-qol aqshaǵa aınaldyrylyp, shetel valútasyna aýystyrylǵan", — dep QMA tolyq málimdedi.
Qazirgi ýaqytta eldiń 16 óńirinen 80 jábirlenýshi anyqtaldy. Zardap kólemi 120 mln teńgeden asty. Toptyń 8 múshesi qamaýǵa alyndy, eki kúdiktige qatysty úı qamaǵy túrindegi bultartpaý sharasy tańdaldy. Sot sanksıasymen kúdiktilerdiń múlkine, onyń ishinde 8 páter, avtokólik jáne 52 myń USDT kólemindegi sıfrlyq aktıvterge tyıym salyndy. Tergeý jalǵasýda.