Kókshetaýda esirtki qylmysyna qarsy is-qımyl basqarmasynyń qyzmetkerleri asa iri mólsherdegi mefedron psıhotroptyq zatyn ótkizý deregin toqtatyp, buryn sottalǵan, biraq jazasyn óteý merzimi keıinge qaldyrylǵan 43 jastaǵy er adamdy ustady, dep habarlaıdy infohub.kz saıty.
Aqmola oblysy polısıa departamentiniń málimetinshe, er adam qylmys ústinde ustalǵan. Tintý barysynda odan tyıym salynǵan zat salynǵan 22 orama, sondaı-aq aldyn ala derekter boıynsha quqyqqa qarsy áreketke paıdalanylýy múmkin uıaly telefon tárkilendi.
Ol buǵan deıin esirtki qylmysy úshin birneshe ret qylmystyq jaýapkershilikke tartylǵany atap ótildi. Aǵymdaǵy jyldyń shildesinde sot ony tyıym salynǵan zattardy ótkizgeni úshin kináli dep tanyp, bes jyl tórt aıǵa bas bostandyǵynan aıyrý jazasyn taǵaıyndady.
Er adamnyń jesir ekenin jáne kámeletke tolmaǵan balany jalǵyz tárbıelep otyrǵanyn eskerip, sot jazasyn óteý merzimin úsh jylǵa keıinge qaldyrdy.
«Alaıda sot bergen múmkindikti fıgýrant paıdalanbaı, jazasyn óteý merzimi keıinge qaldyrylǵan kezde qaıtadan zańsyz áreketin jalǵastyrdy. Nátıjesinde ol esirtkini kezekti ret ótkizý kezinde ustaldy. Osy derek boıynsha qylmystyq is qozǵaldy. Sotqa deıingi tergeý kezeńinde er adam ustalyp, ýaqytsha ustaý ızolátoryna qamaldy», — dedi polısıada.
Polısıada qazirgi tańda esirtki qylmysy úshin jazasyn ustalǵan adamnyń qyzy da ótep jatqanyn qosty.
«Esirtkiniń zańsyz aınalymy qylmystyq jaýapkershilikke ákep soǵady, al qylmysty qaıta jasaý zańda kózdelgen jazadan bosatpaıdy», — dep eske saldy quqyq qorǵaý organdary.