Kókshetaýda polısıa shetelge zańsyz jumysqa ornalastyrýǵa baılanysty alaıaqtyq isin tergep jatyr. Jergilikti turǵyn resmı jumyssyz júrip, birneshe jyl boıy azamattardy aldap, Ulybrıtanıaǵa jumysqa barýǵa kómektesemin dep ondaǵan mıllıon teńge jınaǵan, dep habarlaıdy infohub.kz saıty.
Alaıaqtyq sqemasy áleýmettik jeliler arqyly júzege asyrylǵan. 2023 jyldan 2026 jyldyń qańtaryna deıin kúdikti Ulybrıtanıaǵa barýǵa qujattardy rásimdeý qyzmetin belsendi túrde usynǵan. Ol jumys vızasyn rásimdeý, medısınalyq saqtandyrý, bıometrıadan ótý jáne ártúrli alymdar úshin aqsha alǵan. Qarajatty qolma-qol jáne aýdarym arqyly qabyldaǵan, biraq ýádeleriniń eshqaısysyn oryndamaǵan.
Qazirgi ýaqytta is boıynsha 93 adam jábirlenýshi retinde tanylǵan. Aldyn ala baǵalaý boıynsha, jalpy shyǵyn shamamen 60 mıllıon teńgeni quraıdy. Tergeý organdary Qazaqstan Respýblıkasy Qylmystyq kodeksiniń 190-babynyń 4-bóligi boıynsha («Asa iri kólemdegi alaıaqtyq») qylmystyq is qozǵady. Kúdiktige qatysty úıqamaq túrindegi bultartpaý sharasy tańdaldy. Tergeý jalǵasýda.