Qazaqstan Damý banki Almaty oblysyndaǵy «Kólsaı» kanat jolynyń qurylysy men paıdalanýyn qarjylandyrý múmkindigin qarastyryp jatyr. Ótinim ındıkatıvti taldaýdan ótý úshin qujattar jınaý satysynda tur, dep habarlaıdy infohub.kz saıty.
Qaryz alýshy — «Stroı Indýstrıa kompanıasy», al jobanyń paıda alýshysy retinde Samat Ahman kórsetilgen. Joba týrızm salasyna jatady.
Másele uzyndyǵy 6,3 km bolatyn, Tómengi jáne Ortańǵy Kólsaıdy jalǵaıtyn kanat joly týraly bolyp otyr. Nysannyń salyný jospary týraly Almaty oblysynyń bıligi buǵan deıin habarlaǵan. Ákimdiktiń dereginshe, jeli eki bólikten turady: birinshisiniń uzyndyǵy shamamen 3,5 km — Batan ańǵaryna deıin, ekinshisiniń uzyndyǵy 2,8 km — Ortańǵy Kólsaı kóliniń joǵarǵy aǵysyna deıin. Kabınalardy segiz oryndyq etip jasaý josparlanýda.
2026 jylǵy aqpanda oblys bıligi kanat jolynyń ótkizý qabileti saǵatyna 1,5 myń adamǵa deıin jetýi múmkin ekenin habarlaǵan. Joba kólder arasyndaǵy júrip-turýdy qaýipsiz ári jyl boıy qoljetimdi etý tásili retinde usynylǵan.
Naýryzda Almaty oblysy týrızm basqarmasynyń basshysy Qýanyshbek Meırambekuly ınvestor jobanyń bas josparyn daıyndap, ony ekologıa mınıstrligimen jáne Orman sharýashylyǵy men janýarlar dúnıesi komıtetimen kelisip jatqanyn málimdegen. Sol kezde ınvestısıa kólemi bas jospar daıyndalǵannan keıin belgili bolatyny aıtylǵan.
Jobanyń ınvestory retinde buǵan deıin «Stroı Indýstrıa kompanıasy» atalǵan. Fırma qurylys naryǵynda 2005 jyldan beri jumys isteıdi, qurylys jáne jobalaý jumystaryna I sanatty lısenzıasy bar jáne turǵyn úı, áleýmettik jáne ınfraqurylymdyq jobalardy iske asyrýǵa qatysqan. Onyń quryltaıshysy — Samat Ahman, ol sondaı-aq birqatar basqa qurylys kompanıalaryna ıelik etedi jáne basqarady.
Kanat jolynyń jabdyqtaryn jetkizýshi kanat joldaryn jobalaýǵa, óndirýge jáne qyzmet kórsetýge mamandanǵan qytaılyq Hanzhong Daqin Machinery Co., Ltd. bolýy tıis. Taraptar arasyndaǵy yntymaqtastyq týraly kelisim 2025 jylǵy mamyrda Qytaıdyń Hanchjoý qalasynda qol qoıylǵan.
Almaty oblysy ákimdiginiń dereginshe, Kólsaı kólderine týrısik aǵyn tez ósýde. 2024 jyly tabıǵı parkke 400 myńnan astam adam kelse, 2025 jyly bul kórsetkish shamamen 600 myń týrıske jetken.