Qonaev garnızonyndaǵy áskerı bólimderdiń birinde 2026 jylǵy 3 tamyzda tótenshe oqıǵa boldy: merzimdi qyzmettegi áskerı qyzmetker tórtinshi qabattyń terezesinen qulap, jaraqat aldy, dep habarlaıdy infohub.kz saıty.
Qazaqstan Respýblıkasy Qarýly Kúshteriniń desanttyq-shabýyldaý áskerlerinde habarlaǵandaı, zardap shekken soldat jedel túrde medısınalyq mekemege jetkizilip, qajetti mamandandyrylǵan kómek kórsetilýde. Áskerı qyzmetkerdiń jaǵdaıy dárigerlerdiń turaqty baqylaýynda.
Vedomstvo oqıǵaǵa deıin áskerı qyzmetker qyzmet jaǵdaıyna shaǵymdanbaǵanyn atap ótti. Qarsańynda ol bólimge kelgen ata-anasymen kezdesken, biraq olardan da eshqandaı ótinish nemese aryz túsken joq.
Osy fakti boıynsha QR İshki ister mınıstrliginiń Áskerı-tergeý basqarmasy qylmystyq is qozǵap, tergeý amaldary júrgizilýde. Qorǵanys mınıstrligi qyzmettik tekserý taǵaıyndap, arnaıy komısıa quryldy. Jaǵdaı erekshe baqylaýǵa alyndy.
«Analar júregi» sarbaz analary komıteti» respýblıkalyq qoǵamdyq birlestigi de bolǵan oqıǵaǵa ún qatty. Uıymda Qonaev qalasyndaǵy 32363 áskerı bóliminde merzimdi ásker qyzmetkeri tórtinshi qabattan qulap, aýyr jaraqat alǵanyn rastady.
Komıtet ókili dereý oqıǵa ornyna baryp, zardap shekken soldatty aýrýhanada kórip, onyń ákesi men ájesimen, bólim basshylyǵymen jáne narádta birge bolǵan áriptesterimen sóılesti. Komıtette qazirgi basty másele — soldattyń ómiri men densaýlyǵy ekenin atap ótip, oǵan tezirek saýyǵyp ketýin tiledi.
Uıym tergeý aıaqtalǵanǵa deıin ósek pen tekserilmegen aqparat taratpaýǵa shaqyryp, árbir mán-jaıdyń quzyretti organdar tarapynan muqıat anyqtalýy tıis ekenin aıtty. Komıtet jaǵdaıdy baqylaýda ustaýdy jalǵastyrady.