Qazaqstan Qorǵanys mınıstrligi áleýmettik jelilerde merzimdi áskerı qyzmettegi matrostar Ahmetov A.A. men Maǵaýıa Á.A. týraly taraǵan aqparatqa qatysty resmı málimdeme jasady, dep habarlaıdy infohub.kz saıty.
Suraq týyndaýyna Kaspı teńizine aǵyzyp áketken áskerı qyzmetshiler sany týraly derekterdiń sáıkes kelmeýi sebep boldy: áýelde 19 adam dep habarlansa, keıin 17 adam ekeni belgili boldy. Osynyń aıasynda áleýmettik jelilerde eki matrostyń taǵdyry jóninde boljamdar paıda bola bastady.
Qorǵanys vedomstvosynyń resmı Telegram-arnasynda aıtylǵandaı, Áskerı-teńiz kúshteriniń oqý-jattyǵýy barysynda jeke quramnyń bir bóligi jaǵada bolyp, oqý mindetterin oryndaǵan.
«Merzimdi áskerı qyzmettegi matrostar Ahmetov A.A. men Maǵaýıa Á.A. jaǵada oqý mindetterin oryndaǵan áskerı qyzmetshiler tobyna jatty. Qazirgi tańda atalǵan áskerı qyzmetshiler áskerı bólim ornalasqan jerde júr jáne kún tártibine saı qyzmet atqaryp júr», — dedi vedomstvoda.
Qorǵanys mınıstrligi azamattardy tekserilmegen jáne jalǵan aqparat taratpaýǵa, vedomstvonyń resmı habarlamalaryna súıenýge shaqyrdy.
Eske salaıyq, 24 qyrkúıekte oqý-jaýyngerlik mindetti oryndaý barysynda aýa raıynyń kenetten kúrt nasharlaýy men ekpindi jeldiń saldarynan Kaspı teńizine 17 áskerı qyzmetshi aǵyzylyp ketti, olardyń 14-i qaza tapty. Úsheýi qutqaryldy.
Qaıǵyly oqıǵadan keıin Daýren Kosanov qorǵanys mınıstri qyzmetinen bosatyldy. Onyń ornyna Aıdos Myrzahmetov taǵaıyndaldy.