Qostanaıda dárigerler temirjol vagonynyń tóbesinde sýretke túspek bolǵan 15 jasar jasóspirimdi aýyr elektr jaraqatynan aman alyp qaldy. Mektep oqýshysynyń denesinen 27 myń vólttan asatyn tok ótken, dep habarlaıdy infohub.kz saıty.

Oqıǵa 25 maýsymda bolǵan. Jasóspirim oblystyq balalar aýrýhanasynyń travmpýnktine denesiniń 60 paıyzynan astamyn kúıik shalǵan kúıde jetkizilgen.

Travmatolog-ortoped Mıras Eljasovtyń aıtýynsha, bala dereý reanımasıaǵa jatqyzylyp, onda shamamen bir jarym aı jatqan.

«Baqytymyzǵa oraı, onyń qol-aıaǵyn saqtap qalýǵa múmkindik týdy», — dedi Eljasov.

Dárigerdiń aıtýynsha, mundaı jaraqattarda aman qalý múmkindigi óte tómen. Álemdik jáne respýblıkalyq statısıkaǵa sáıkes, mundaı zaqym alǵan balalardyń shamamen 90 paıyzy alǵashqy aptada kóz jumady.

Qazir jasóspirim reanımasıadan qarapaıym palataǵa aýystyrylǵan. Ony emdeý taǵy eki-úsh aptaǵa sozylýy múmkin, sondyqtan aýrýhanadan shyǵarý týraly áli erte.

Jasóspirimniń aıtýynsha, ol sol kúni dostarymen serýendep júrgen. Olar úıge qysqa jolmen qaıtýdy jón kórip, temirjolmen júripti. Poıyzdy kórgen soń sýretke túskileri kelgen.

«Men vagonnyń tóbesine shyǵyp otyrdym, dosym meni sýretke túsirdi. Sosyn ornymnan turǵanda elektr doǵasy soqty. Sonyń saldarynan meni eki metrdeı qashyqtyqqa laqtyryp tastady», — dedi jasóspirim.

Ol sýretti oqıǵaǵa deıin áleýmettik jelige jarıalap úlgergen.

Tok soqqysynan keıin bala esin joǵaltqan. Esin jıǵan soń aldymen úıine ózi qaıtpaq bolǵan, alaıda kelgen dárigerler oǵan alǵashqy kómek kórsetip, aýrýhanaǵa jetkizgen.

«Qabyldaý bóliminde bári maǵan úlken kózben qaraǵany esimde, sodan keıin es-tússiz qaldym», — deıdi oqýshy.

Emdeý shamamen bir jarym aıǵa sozylǵan. Jasóspirimdi qutqarýǵa dárigerler, sırek kezdesetin qymbat dári-dármekterdi satyp alýǵa kómektesken demeýshiler, sondaı-aq donorlar qatysqan. Balaǵa sırek kezdesetin qan toby — tórtinshi teris qan qajet bolǵan.

Oqıǵadan keıin jasóspirim bolashaq mamandyǵy týraly josparyn ózgertýge sheshim qabyldaǵan. Oqıǵadan eki kún buryn toǵyzynshy synyp túlegi elektrık mamandyǵyna qujat tapsyrǵan edi. Endi ol ómirin medısınamen baılanystyrýdy kózdep otyr.

Oqýshy basqa jasóspirimderge de úndeý tastap, olardy óz qateligin qaıtalamaýǵa, sýret úshin ómirin qaterge tikpeýge shaqyrdy.