Qostanaıda sot eńbek sharty bolmasa da, eńbek qarym-qatynasyn tanydy. Aýyr óndiristik jaraqat alǵan er adamǵa 3 mln teńge ótemaqy tólenedi. Bul týraly infohub.kz saıty NUR.KZ-ge silteme jasap habarlaıdy.
Qostanaı oblysy sottarynyń resmı Telegram-arnasynda habarlanǵandaı, Qostanaı qalalyq soty er adamnyń JSHS-ke qatysty eńbek qarym-qatynasynyń bolǵanyn taný, moraldyq zıannyń ótemaqysyn jáne joǵaltqan tabysyn óndirip alý týraly talap aryzy boıynsha azamattyq isti qarady.
Sot anyqtaǵandaı, talapker 2026 jyldyń aqpan aıynan bastap jaýapkerdiń óndiristik nysanynda eńbek shartyn resimdemeı, dıirmenshi mindetin atqarǵan. 2026 jylǵy 30 naýryzda eńbek mindetin oryndaý kezinde ol aýyr óndiristik jaraqat — sol qolynyń birneshe saýsaǵynyń jaraqattyq ampýtasıasyn alǵan.
Sot otyrysy barysynda eńbek qarym-qatynasynyń faktisi zerttelgen dáleldemelerdiń jıyntyǵymen, onyń ishinde kýágerlerdiń aıǵaqtary, notarıýs kýálandyrǵan messendjerdegi hat almasý, aqsha aýdarymdary týraly málimetter, uıaly baılanys operatorlarynyń talapkerdiń jumys ýaqytyndaǵy ornalasqan jeri týraly aqparaty, sondaı-aq jaýapkerdiń naqty óndiristik qyzmetin kórsetetin memlekettik kirister departamentiniń derekterimen rastaldy.
Usynylǵan dáleldemelerdi baǵalaı kele, sot talapkerdiń jumys berýshiniń ruqsatymen naqty jumysqa jiberilgeni, osyǵan baılanysty taraptar arasynda eńbek qatynasy týyndaǵan degen qorytyndyǵa keldi.
Sot sheshimimen talapkerdiń 2026 jylǵy 1 aqpannan 31 naýryzǵa deıingi kezeńde JSHS-te dıirmenshi laýazymynda eńbek qatynasyn júzege asyrǵan faktisi belgilendi.
Sonymen qatar, jaýapkerden 3 mln teńge kóleminde moraldyq zıan ótemaqysy óndirildi. Joǵaltqan tabysty óndirip alý týraly talapty qanaǵattandyrýdan bas tartyldy, sebebi ol merziminen buryn qoıylǵan, zańda belgilengen tártippen óndiristegi jazataıym oqıǵa boıynsha tergeý júrgizilmegen jáne kásibı eńbekke qabilettiligin joǵaltý dárejesin anyqtaý úshin qajetti akt joq.
Sot sheshimi zańdy kúshine enbegen.