Qostanaıda zańsyz mıkroqarjy qyzmeti men qylmystyq kiristerdi zańdastyrý isi boıynsha úkim shyqty, dep habarlaıdy infohub.kz saıty.
Qarjy monıtorıńi agenttiginiń (QMA) resmı Telegram-arnasynda habarlanǵandaı, QMA-niń Qostanaı oblysy boıynsha departamenti jergilikti turǵynnyń zańnamada kózdelgen lısenzıasyz múlikti kepilge alyp, nesıe berýdi uıymdastyrǵanyn anyqtady. Klıentterdi tartý úshin tanymal saıtta jáne Instagram-da habarlandyrýlar paıdalanylǵan.
«Azamattardyń aýyr materıaldyq jaǵdaıyn jáne olardyń ekinshi deńgeıdegi bankterden nesıe ala almaıtynyn paıdalanyp, ol joǵary paıyzben — jyldyq 120%-ǵa deıin nesıe bergen», — dedi QMA-de.
Sonymen qatar, vedomstvoda atap ótkendeı, notarıat kýálandyrǵan sharttarda nesıeniń asyra kórsetilgen somalary kórsetilgen, óıtkeni olarǵa aldyn ala paıyzdar, resimdeý shyǵyndary jáne basqa da tólemder engizilgen. Máselen, zardap shekkenderdiń biri is júzinde 9 mln teńge alǵan, al shartta 14 mln teńge kórsetilgen. Keıinnen 18 mln teńge mindettemeni kózdeıtin taǵy bir shart resimdelgen, alaıda ol boıynsha aqsha berilmegen. Keıin sot sheshimimen zardap shekken áıelden 26 mln teńge óndirilgen.
Quqyqqa qarsy áreketterdiń nátıjesinde 50-den astam azamat ádeıi tıimsiz sharttarmen qaryz mindettemelerine tartylǵan. Qylmystyq kiris somasy 1 mlrd teńgeden asty.
Sot úkimimen oǵan 2 jyl 8 aı bas bostandyǵynan aıyrý jazasy taǵaıyndaldy. Sonymen qatar, sot qylmystyq kiristerge satyp alynǵan múlikti tárkiledi: tórt páter, eki jer telimi, sondaı-aq Mercedes-Benz G500, Dodge RAM 1500 jáne Hyundai Santa Fe avtomobılderi.
Úkim zańdy kúshine engen joq. Eske salaıyq, 2025 jyldyń mamyrynda QMA-niń Qostanaı oblysy boıynsha departamenti zańsyz mıkroqarjy qyzmetin júzege asyrý faktisi boıynsha sotqa deıingi tergeý júrgizip jatqany habarlanǵan bolatyn. Kúdiktiniń tıisti lısenzıasyz mobıldi qosymshalar, onyń ishinde Instagram arqyly joǵary paıyzben nesıe bergeni kórsetilgen.